ماڭعىستاۋ وبلىسىندا قازاقستانداعى العاشقى جوبا — وقۋشىلاردىڭ راسيونىنا ۇلتتىق سۋسىندى جۇيەلى تۇردە ەنگىزۋ باستالادى. قىركۇيەكتەن باستاپ جاڭاوزەننىڭ 25 مەكتەبىندە بالالارعا تۇيە سۇتىنەن جاسالعان ءداستۇرلى سۋسىن — تابيعي شۇبات فاستفۋدقا پايدالى بالاما رەتىندە بەرىلە باستايدى، دەپ حابارلايدى infohub.kz سايتى.
جوبانىڭ باستاماشىسى، ماڭعىستاۋ وبلىسىنىڭ اكىمى نۇرداۋلەت قيلىباي مەكتەپ تاماقتانۋىنىڭ جاڭا باعدارلاماسىن ىسكە قوسۋدى مەملەكەت باسشىسى قاسىم-جومارت توقاەۆتىڭ كامەلەتكە تولماعانداردى زياندى تاعامنان قورعاۋ جونىندەگى سوڭعى تاپسىرمالارىمەن بايلانىستىردى.
«بۇگىن مەملەكەت باسشىسى قاسىم-جومارت توقايەۆ فاستفۋدتىڭ اگرەسسيۆتى جارناماسى ماسەلەسىنە جانە وسكەلەڭ ۇرپاقتىڭ دەنساۋلىعىن قورعاۋعا ەرەكشە نازار اۋدارۋ قاجەتتىگىنە توقتالدى. ءبىزدىڭ شۇباتتى مەكتەپ تاماقتانۋىنا ەنگىزۋ جونىندەگى باستامامىز — وسى باعىتتاعى ناقتى قادام. ءبىز جەرگىلىكتى ءوندىرىستىڭ تابيعي جانە ساپالى ونىمدەرى بالالارىمىزعا قولجەتىمدى بولۋىن قامتاماسىز ەتۋىمىز كەرەك»، — دەدى ءوڭىر باسشىسى.
مەملەكەت باسشىسى زياندى تاعامدى ناسيحاتتاۋ ەلدىڭ ەڭبەك الەۋەتىنە تىكەلەي تەرىس اسەر ەتىپ، دەنساۋلىق ساقتاۋ جۇيەسىنە قوسىمشا جۇكتەمە تۋدىراتىنىن ايتقان بولاتىن.
«دارىگەرلەردىڭ باقىلاۋى بويىنشا، ءقازىر قانت ديابەتىمەن اۋىراتىن 7 مىڭعا جۋىق بالا بار جانە بۇل كورسەتكىش ازايماي، ءتىپتى ءوسىپ وتىر. كوپتەگەن مەملەكەتتەر وسكەلەڭ ۇرپاققا باعىتتالعان قۇرامىندا مايى، قانتى جانە تۇزى جوعارى ونىمدەردىڭ جارناماسىنا تىيىم سالادى نەمەسە شەكتەيدى»، — دەپ اتاپ ءوتتى قاسىم-جومارت توقايەۆ.
ماڭعىستاۋ وبلىسىنداعى جوبا 26 تامىزدا سالتاناتتى تۇردە اشىلعان «نار-بوتا» شۇبات قۇيۋدىڭ جاڭا سەحىنىڭ بازاسىندا جۇزەگە اسىرىلۋدا. ءوندىرىس الاڭى 300 شارشى مەتردى الىپ جاتىر، ال كاسىپورىننىڭ جوبالىق قۋاتى جىلىنا 400 توننا دايىن ءونىم شىعارۋعا ەسەپتەلگەن.
تەحنولوگيالىق تىزبەك بارلىق نەگىزگى كەزەڭدەردى قامتيدى: شيكى تۇيە ءسۇتىن قابىلداۋ، ونى وڭدەۋ، قۇيۋ جانە كەيىننەن ساقتاۋ. ءوندىرىس الاڭىنىڭ اشىلۋى تۇيە شارۋاشىلىعىنا ماماندانعان جەرگىلىكتى فەرمەرلىك شارۋاشىلىقتار ءۇشىن تۇراقتى وتكىزۋ نارىعىن قالىپتاستىرادى جانە وڭىردە تابيعي شيكىزاتقا ۇزاق مەرزىمدى سۇرانىستى قامتاماسىز ەتەدى.