«شۇعىلا Gold» التىن وندىرەتىن كومپانياسى 2025 جىلدىڭ قورىتىندىسى بويىنشا 4،76 ملرد تەڭگە پايدا تاپتى. ال 2024 جىلى ونىڭ شىعىنى 4،8 ملرد تەڭگە بولعان. بۇل تۋرالى كاسىپورىننىڭ قارجىلىق ەسەپتىلىگىندە ايتىلعان، دەپ حابارلايدى infohub.kz سايتى.
كومپانيانىڭ 2025 جىلعى ءتۇسىمى 9،7 ملرد تەڭگەگە جەتتى، ال ءبىر جىل بۇرىن بۇل كورسەتكىش 281،1 ملن تەڭگە ەدى. 2024–2025 جىلدارى ءتۇسىمنىڭ بارلىعى دورە قورىتپاسىن ساتۋدان تۇسكەن كىرىس ەسەبىنەن قالىپتاستى. ونداعى التىن مەن كۇمىستىڭ ۇلەسى كەمىندە 70% بولۋى ءتيىس. 2025 جىلدىڭ سوڭىندا جابىلماعان شىعىن 7،77 ملرد تەڭگەدەن 3،06 ملرد تەڭگەگە دەيىن قىسقاردى.
اباي وبلىسىنداعى اقجال اۋىلىندا تىركەلگەن «شۇعىلا Gold» كومپانياسىنىڭ جالعىز يەسى — «شۇعىلا كەنت» كومپانياسى. ەكى قۇرىلىمنىڭ دا باسشىسى — ەرعالىم ساداقوۆ. ءوز كەزەگىندە «شۇعىلا كەنتتىڭ» يەسى — KST Production كومپانياسى. KST Production-نىڭ بىرلەسكەن يەلەرى رەتىندە ابزال نۋرييەۆ پەن ءتاسليما سارسەباەۆا كورسەتىلگەن. ابزال نۋرييەۆ سونىمەن قاتار اقتوبەدەگى Azit كومپانياسىنا يەلىك ەتەدى.
«شۇعىلا Gold» قاتتى پايدالى قازبالاردى گەولوگيالىق بارلاۋعا ەكى ليسەنزيا مەن وندىرۋگە ەكى كەلىسىمشارتقا يە. كومپانيانىڭ نەگىزگى قىزمەت ءتۇرى — اسىل مەتالدار مەن سيرەك مەتالل كەندەرىن ءوندىرۋ دەپ كورسەتىلگەن.
بۇعان دەيىن «شۇعىلا Gold» كومپانياسىنىڭ تۇپكىلىكتى يەلەرى قازاقستاندىقتار اسەل مەدەۋوۆا مەن باقىتجان سەيىتجان بولعان. كومپانيا 2026 جىلى شىعىس قازاقستان وبلىسىنىڭ جارما اۋدانىنداعى بيۋكۋي وزەنى اڭعارى مەن بالكا كولورادو ۋچاسكەسىندە شاشىراڭقى التىن ءوندىرۋدى باستاۋدى جوسپارلاعان، دەپ جازعان «كۋرسيۆ». بۇل ۋچاسكەدەگى س1 ساناتى بويىنشا راستالعان قورلار تازا اسىل مەتالدىڭ 202،4 كەلىسىن قۇرايدى.
سونىمەن قاتار «شۇعىلا Gold» 2027 جىلى اباي وبلىسىنىڭ جارما اۋدانىنداعى اقدينگەك كەن ورنىندا قۇرامىندا التىنى بار كەندى ونەركاسىپتىك ءوندىرۋدى باستاۋدى جوسپارلاعان. ءوندىرۋدى جىلىنا 100 مىڭ توننا قۇرامىندا التىنى بار كەن وندىرەتىن جوبالىق قۋاتى بار كارەردە اشىق ادىسپەن جۇرگىزۋ كوزدەلگەن. بارلىق التىندى بەس جىلدا — 2027 جىلدان 2031 جىلعا دەيىن الۋ جوسپارلانعان.