قازاقستاندىق بالۋان شۇعىلا ومىربەك ازيا ويىندارى-2026-نىڭ قولا مەدالىن جەڭىپ الا المادى: 53 كەلىگە دەيىنگى سالماق دارەجەسىندەگى ءۇشىنشى ورىن ءۇشىن بەلدەسۋدە ول جۇڭگو وكىلى چجان سزينگە جول بەردى، دەپ حابارلايدى infohub.kz سايتى.
ءبىرىنشى كەزەڭنەن كەيىن قازاقستاندىق بالۋاننىڭ قارسىلاسى 4:2 ەسەبىمەن الدا تۇردى. ەكىنشى ءۇش مينۋتتىق بولىكتە چجان تاعى ءتورت ۇپاي جيناپ، كەزدەسۋدى تۇشادا جەڭىسپەن اياقتادى.
ومىربەك ءتۋرنيردى ءۇندىستاندىق انتيمنەن 0:9 ەسەبىمەن جەڭىلىسپەن باستادى. انتيم فينالعا شىققان سوڭ، قازاقستاندىق بالۋان جۇباتۋ راۋندى ارقىلى مەدال ءۇشىن كۇرەستى جالعاستىرۋ مۇمكىندىگىنە يە بولدى. وندا ومىربەك 2:2 ەسەبىندە وزبەكستاندىق ساكيبجامال ەسبوسىنوۆانى سوڭعى ناتيجەلى ارەكەتىنىڭ ارقاسىندا ۇتىپ، قولا بەلدەسۋگە شىقتى.
وسىلايشا، ومىربەك ازيا ويىندارى-2026-نى بەسىنشى ورىنمەن اياقتادى. بۇعان دەيىن ول 2026 جىلعى U23 الەم چەمپيونى جانە 2026 جىلعى ازيا چەمپيونى اتانعان بولاتىن.
الدىڭعى كۇنى ايەلدەر كۇرەسىندە ەلميرا سىزدىقوۆا كۇمىس، زەينەپ بايانوۆا قولا جۇلدە جەڭىپ الدى.
ەركىن كۇرەستەن ۇلتتىق قۇراما ءۇش قولا مەدالعا قول جەتكىزدى. ولاردى ناچىن كۋۋلار، ەدىگە قاسىمبەك جانە نۇرقوجا قايپانوۆ يەلەندى. ازامات داۋلەتبەكوۆ ءۇشىنشى ورىن ءۇشىن بەلدەسۋدە جەڭىلىس تاپتى.
گرەك-ريم كۇرەسىنەن قازاقستان قۇراماسى ازيا ويىندارىنىڭ ءبىر مەدالىن جەڭىپ الدى. قولانى مەيىرجان شەرماحانبەت يەلەندى. شاميل وجايەۆ پەن يسلام ەۆلويەۆ قۇرمەت تۇعىرىنان ءبىر قادام قالعاندا توقتادى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن جارىستا 460 مەدال جيىنتىعى ساراپقا سالىنۋدا. ازيا ويىندارى-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى سىنعا تۇسۋدە.
ازيا ويىندارى-2026 شولۋلارى: 1-كۇن، 2-كۇن، 3-كۇن، 4-كۇن، 5-كۇن، 6-كۇن، 7-كۇن، 8-كۇن، 9-كۇن، 10-كۇن، 11-كۇن، 12-كۇن، 13-كۇن.