شۆەيساريا قازاقستانمەن تۇراقتى تىكەلەي اۋە قاتىناسىن اشۋ مۇمكىندىگىن زەرتتەپ جاتىر. استانادا وتكەن ەكى ەلدىڭ اۆياسيالىق بيلىكتەرىنىڭ كەلىسسوزدەرىنىڭ قورىتىندىسى بويىنشا، بۇل ءۇشىن قاجەتتى قۇقىقتىق بازا ءقازىردىڭ وزىندە قۇرىلعان، دەپ حابارلايدى infohub.kz سايتى.
«شۆەيساريا تاراپى ەكى ەل اراسىنداعى تىكەلەي اۋە قاتىناسىن دامىتۋدا پەرسپەكتيۆالار بار ەكەنىن مالىمدەدى جانە قازىرگى ۋاقىتتا قازاقستانعا تۇراقتى رەيستەر اشۋ مۇمكىندىگىن قاراستىرىپ جاتىر. قازاقستان مەن شۆەيساريا اراسىنداعى تىكەلەي اۋە قاتىناسىن دامىتۋ ەكى ەل اراسىنداعى تۋريستىك، ساۋدا-ەكونوميكالىق جانە ىسكەرلىك بايلانىستاردى نىعايتۋعا، سونداي-اق ءوزارا جولاۋشىلار جانە ىسكەرلىك اعىنداردى ۇلعايتۋعا قوسىمشا مۇمكىندىكتەر تۋعىزادى»، — دەلىنگەن حابارلامادا.
ۇشۋلاردى ىقتيمال باستاۋ ءۇشىن تاراپتار ءوزارا تۇسىنىستىك تۋرالى مەموراندۋمعا قول قويدى. قۇجات تاعايىندالعان اۋەكومپانيالارعا اپتاسىنا 28 جولاۋشى رەيسىن ورىنداۋ قۇقىعىن قاراستىرادى.
«تاراپتار سونداي-اق اۋە قاتىناسى تۋرالى كەلىسىم جوباسىنىڭ ءماتىنىن كەلىسىپ، وعان پاراف قويدى، ول كەيىننەن قول قويىلىپ، قازاقستان مەن شۆەيساريا اراسىنداعى اۋە قاتىناسىن ودان ءارى دامىتۋدىڭ جاڭارتىلعان قۇقىقتىق نەگىزىن قالىپتاستىرادى»، — دەپ قوستى ۆەدومستۆو.
بۇعان دەيىن قازاقستان مەن ساۋد ارابياسى ەلدەر اراسىنداعى اۋە رەيستەرىنىڭ سانىن كوبەيتۋ تۋرالى كەلىسكەنى حابارلانعان بولاتىن.