شۆەيساريانىڭ سولتۇستىگىندەگى اارگاۋ كانتونىنداعى رەيۆ كەزىندە بولعان اتىستان ءبىر ادام قازا تاۋىپ، تاعى بەس ادام جارالاندى. بۇل تۋرالى جەرگىلىكتى پوليسيا مەن ب ا ق حابارلادى. وقيعا جەكسەنبى كۇنى تاڭەرتەڭ ەرتە بولعان.
كانتون پوليسياسىنىڭ X الەۋمەتتىك جەلىسىندەگى پاراقشاسىندا جاريالانعان مالىمەتكە سايكەس، كانتون استاناسى ااراۋ قالاسىنداعى شارا كەزىندە ءبىر ادام قازا تاۋىپ، بەس ادام جارالانعان. ولاردىڭ بىرنەشەۋىنىڭ جاعدايى اۋىر. ااراۋ سيۋريحتەن 46 شاقىرىم باتىستا ورنالاسقان.
پوليسيا وكىلى پاسكال ۆەنسەلدىڭ شۆەيساريانىڭ قوعامدىق تەلەراديو كومپانياسى SRF-كە ايتۋىنشا، اتىس تۋرالى حابارلاما شامامەن تاڭعى 02:30-دا تۇسكەن. وقيعا كەزىندە ااراۋدىڭ شاحەن اۋدانىنداعى ات سپورتى الاڭىندا «Aarau Rave VOL. 7» اتتى شارا ءوتىپ جاتقان. ءورت ءسوندىرۋ قىزمەتى اينالانىڭ ۇلكەن بولىگىن قورشاۋعا العان.
قازىرگى ۋاقىتتا ءىرى پوليسيا وپەراسياسى جۇرگىزىلۋدە، جەرگىلىكتى تۇرعىندارعا ايماقتان اۋلاق بولۋ ۇسىنىلدى. پوليسيا كۇدىكتىنى ءالى ىزدەپ جاتقانىن مالىمدەدى. ااراۋ قالاسىنىڭ تۇرعىنى شامامەن 22 300 ادامدى قۇرايدى.