شۆەيساريانىڭ Ursem Holding AG كومپانياسىنا تيەسىلى قاراعاندىداعى سارى مامىر جانە مارگارين وندىرەتىن زاۋىت 2025 جىلدىڭ قورىتىندىسى بويىنشا يەسىنە 3،7 ملرد تەڭگە تازا پايدا اكەلدى. بۇل كورسەتكىش ءبىر جىل بۇرىنعىدان 3،8%-عا تومەن، دەپ حابارلايدى infohub.kz سايتى.
Eurasian Foods حولدينگىنىڭ قۇرامىنداعى كاسىپورىننىڭ تابىسى ايتارلىقتاي ءوسىپ، ءبىر جىل ىشىندە 41%-عا ارتىپ، 57،5 ملرد تەڭگەگە جەتتى. نەگىزگى كىرىس كوزى – دايىن ءونىمدى ساتۋ. الايدا، سونىمەن بىرگە ءونىمنىڭ وزىندىك قۇنى 44،7%-عا (47 ملرد تەڭگەگە دەيىن)، ال ساتۋ شىعىندارى 33%-عا (2 ملرد تەڭگەگە دەيىن) ءوستى. اتاپ ايتقاندا، كولىك شىعىندارى 1،3 ملرد تەڭگەگە دەيىن كوتەرىلدى، بۇل تاۋارلاردى جەتكىزۋگە بايلانىستى بولۋى مۇمكىن.
2025 جىلى پايدانىڭ الدىڭعى جىلمەن سالىستىرعاندا تومەندەۋى كوبىنەسە قارجىلىق كورسەتكىشتەرگە بايلانىستى. مەملەكەتتىك سۋبسيديالاردىڭ ازايۋىنا بايلانىستى قارجىلىق كىرىستەر 880 ملن تەڭگەگە قىسقارىپ، 282 ملن تەڭگەنى قۇرادى. ال قارجىلىق شىعىستار 32%-عا ءوسىپ، 2،9 ملرد تەڭگەگە جەتتى، بۇل نەگىزىنەن نەسيەلەر بويىنشا پايىزدىق تولەمدەرگە بايلانىستى.
كاسىپورىننىڭ قارىز قاراجاتىنىڭ قۇرىلىمى ايتارلىقتاي وزگەردى: ۇزاق مەرزىمدى نەسيەلەر 3،6 ەسەگە ارتىپ، 9 ملرد تەڭگەگە جەتتى، ال قىسقا مەرزىمدى نەسيەلەر 6،6 ملرد تەڭگەگە ازايىپ، 4،7 ملرد تەڭگەگە ءتۇستى.
ەسكە سالايىق، Eurasian Foods Corporation – قۇرامىنا قاراعاندى زاۋىتى كىرەتىن حولدينگ. 2000 جىلدىڭ قاراشا ايىندا كومپانيانىڭ 100% جاي اكسياسىن شۆەيساريالىق Ursem Holding AG ساتىپ العان. كاسىپورىن «يرتىش»، «زلاتىە گورى» جانە Eurasian Foods برەندتەرىمەن مارگارين، سپرەد جانە سارى مامىر شىعارادى.
بۇعان دەيىن حولدينگتىڭ تاعى ءبىر كاسىپورنى – سولتۇستىك قازاقستان وبلىسىنداعى Eurasian Milk زاۋىتىندا قويۋلاندىرىلعان ءسۇت وندىرەتىن ەلىمىزدەگى ەڭ ءىرى سەح ىسكە قوسىلىپ، زاۋىت تولىق قۋاتىنا شىققانى حابارلانعان بولاتىن.