شىعىس قازاقستان وبلىسىندا راحمانوۆ بۇلاقتارىنا اپاراتىن پيحتوۆكا وزەنىنەن وتەتىن كوپىردىڭ قۇرىلىسى اياقتالدى. «قازاۆتوجول» ۇلتتىق اۆتوجول وپەراتورىنىڭ مالىمەتىنشە، قۇرىلىستىڭ ۇزىندىعى 175 مەتر، ال ول جەر بەدەرىنەن 45 مەترگە دەيىنگى بيىكتىكتە تۇرعىزىلعان، دەپ حابارلايدى infohub.kz سايتى.
سوڭعى كەزەڭ تاۋ شاتقالىنىڭ ەكى جاعاسىن جالعاعان جەتىنشى ارالىقتى ورناتۋ بولدى. كوپىر ءارقايسىسى 24 مەتردەن تۇراتىن جەتى ارالىقتان جانە سەگىز تىرەكتەن تۇرادى — ەكەۋى جاعالاۋدا، التاۋى ارالىقتا. بارلىق تىرەكتەر ورناتىلىپ، ارالىقتاردى مونتاجداۋ اياقتالدى، الايدا نىساندا اباتتاندىرۋ جۇمىستارى جالعاسۋدا.
«بۇگىن ءبىز ءۇشىن شىنىمەن ايتۋلى كۇن. پيحتوۆكا ارقىلى وتەتىن كوپىر قۇرىلىسىنىڭ اياقتالۋى — ۇلكەن كوماندانىڭ وراسان زور ەڭبەگىنىڭ ناتيجەسى. نىسان كۇردەلى تاۋ جاعدايىندا سالىندى، مۇندا ءاربىر ينجەنەرلىك شەشىم بارىنشا دالدىك پەن جاۋاپكەرشىلىكتى تالاپ ەتتى»، — دەدى «قازاۆتوجول» اق شىعىس قازاقستان وبلىستىق فيليالىنىڭ ديرەكتورى نۇربەك تەمىرحانوۆ.
قۇرىلىسقا 150-گە جۋىق مامان قاتىستى. كۇردەلى تاۋ بەدەرىنە بايلانىستى ماتەريالداردى جەتكىزۋ مەن اۋىر تەحنيكانىڭ جۇمىسىن قيىن قولجەتىمدى جەردە ۇيىمداستىرۋعا تۋرا كەلدى. بەتون جۇمىستارى ءۇشىن الاڭدا جىلجىمالى بەتون زاۋىتى ورناتىلدى.
قازىرگى تاڭدا كوپىردە بەتون تۇمسىقتار مەن قورشاۋلار ورناتىلىپ، پاراپەتتەر مونتاجدالىپ، بەتكەيلەر «رەنو» ماتراستارىمەن جانە گابيون قۇرىلىمدارىمەن نىعايتىلىپ، جول قاۋىپسىزدىگى شارالارى جۇرگىزىلۋدە.
اسفالتبەتون جابىنىن قىركۇيەكتىڭ سوڭىنا دەيىن توسەۋ جوسپارلانۋدا. بارلىق اباتتاندىرۋ جانە قاۋىپسىزدىكتى قامتاماسىز ەتۋ جۇمىستارى اياقتالعان سوڭ كوپىر قوزعالىسقا اشىلۋعا دايىن بولادى.
بۇعان دەيىن «كۋرسيۆ» استانادا ەسىل ارقىلى جاڭا سەگىز جولاقتى كوپىر سالىناتىنىن جازعان بولاتىن.