الماتىدا تاۋ شاڭعىسى ينفراقۇرىلىمىن كەڭەيتۋ جوسپارلانۋدا. جوبا ىسكە اسقاننان كەيىن «شىمبۇلاق» كۇنىنە 30 مىڭعا دەيىن كەلۋشىنى قابىلداي الادى، دەپ حابارلايدى infohub.kz سايتى.
الماتى اكىمدىگى «شىمبۇلاق» جانە Oi-Qaragai تاۋ شاڭعىسى كۋرورتتارىن «مەدەۋ» بازالىق ستانسياسى ارقىلى ءبىرتۇتاس جۇيەگە بىرىكتىرمەك. بۇل تۋرالى قالالىق تۋريزم باسقارماسى حابارلادى.
جوبا 30 جاڭا كانات جولىن سالۋدى، 151 شاقىرىم تاۋ شاڭعىسى تراسساسىن جاساۋدى، سونداي-اق قولدانىستاعى ينفراقۇرىلىمدى جاڭارتۋدى كوزدەيدى.
«جوبا ىسكە اسقاننان كەيىن تاۋ شاڭعىسى جۇيەسىنىڭ وتكىزۋ قابىلەتى بەس ەسەگە – كۇنىنە 6 مىڭنان 30 مىڭ كەلۋشىگە دەيىن ارتادى»، – دەپ مالىمدەدى تۋريزم باسقارماسىندا.
سونىمەن قاتار الماتىدا 2029 جىلعا دەيىنگى الماتى تاۋ كلاستەرىن دامىتۋدىڭ كەشەندى جوسپارى ازىرلەنۋدە. قۇجات جەتى باعىت بويىنشا 73 ءىس-شارانى قامتيدى.
«جوسپار تاۋ ينفراقۇرىلىمىن دامىتۋدى، تاۋ شاڭعىسى كۋرورتتارىنىڭ ءبىرىڭعاي جۇيەسىن قۇرۋدى، جاڭا كانات جولدارىن سالۋدى جانە تۋريستىك باعدارلاردى دامىتۋدى كوزدەيدى»، – دەپ ۆەدومستۆو مالىمدەدى.
جوسپارلانعان جوبالاردى ىسكە اسىرۋ شەتەلدىك تۋريستەر اعىنىن ەكى ەسەگە دەرلىك ارتتىرادى – 986 مىڭنان 1،7 ملن ادامعا دەيىن. سونىمەن قاتار، بولجام بويىنشا، تۋريستىك سالادا جۇمىس ىستەيتىندەردىڭ سانى 101،8 مىڭ ادامعا دەيىن وسەدى.