شىمكەنتتە توزىعى جەتكەن جانە اپاتتى ۇيلەردەن 600-دەن استام وتباسىن كوشىرۋ جوسپارلانىپ وتىر – مەگاپوليستەگى رەنوۆاسيا باعدارلاماسىن 2030 جىلعا دەيىن اياقتاۋ كوزدەلگەن. الايدا قالا تۇرعىندارىنىڭ ءبىر بولىگىندە سۇراقتار تۋىنداپ وتىر، دەپ حابارلايدى infohub.kz سايتى.
توزىعى جەتكەن ۇيلەردە تۇرعان وتباسىلار جاڭا پاتەرلەردىڭ كىلتىن الىپ جاتىر. «ەسكى پاتەرىم نەبارى 24 شارشى مەتر ەدى، ءۇي اپاتتى بولاتىن. ال جاڭاسى – 41 شارشى مەتر. ماعان ءبارى قاتتى ۇنايدى. ەگدە جاستاعى ادامدارعا قولايلى جاعداي جاسالعان»، – دەدى قالا تۇرعىنى قارشىعا ءالىموۆا.
قاڭىراپ قالعان الاڭدار مەن بۇزۋ جۇمىستارى كورشىلەس قالعاندار ءۇشىن سىناققا اينالدى. ادامدار ەندى سۋ، ەلەكتر جانە گاز ۇزدىكسىز بەرىلمەيتىنىنە شاعىمدانادى. «ەكىنشى جىل ۇيلەردى بۇزىپ جاتىر، ال جەكە سەكتور قالدى. بىزگە ۇيلەرىمىز ءۇشىن اقشالاي وتەماقى تولەيمىز دەپ ۋادە ەتكەن، ءبىراق ازىرگە ءۇن جوق. كۇتىپ ءجۇرمىز. وسىنىڭ سالدارىنان ءقازىر سۋدىڭ ساپاسى ناشارلادى، جارىق ۇنەمى سونەدى، گاز وشەدى. قىستا نە ىستەيتىنىمىزدى بىلمەيمىن»، – دەپ نارازىلىق ءبىلدىردى شىمكەنت تۇرعىنى يلسيا شافيگۋللينا.
دەگەنمەن جەكە سەكتور ماسەلەسى ازىرگە اشىق كۇيىندە قالىپ وتىر. كوكساي شاعىن اۋدانىنداعى جەكە تۇرعىن ۇيلەردىڭ كوپتەگەن يەسىنىڭ قۇجاتتارى تولىق راسىمدەلمەگەنى انىقتالدى.
«2030 جىلعا دەيىن قالا بويىنشا 66 ءۇي – 600 پاتەر بويىنشا باعدارلاما بەكىتىلدى. بارلىق كوپقاباتتى ۇيلەردىڭ تەحنيكالىق جاعدايىنا تەكسەرۋ جۇرگىزىلدى. تەكسەرۋدى ارنايى اككرەديتتەلگەن جانە اتتەستاتتالعان ۇيىمدار جۇرگىزدى»، – دەدى قالالىق قۇرىلىس باسقارماسى باسشىسىنىڭ ورىنباسارى ەرداۋلەت اجىبايەۆ.
باعدارلامانى جەكە ينۆەستورلاردىڭ ەسەبىنەن ىسكە اسىرۋ جوسپارلانىپ وتىر. ءۇش كومپانيا ءقازىردىڭ وزىندە قىزىعۋشىلىق تانىتقان. قۇرىلىس باسقارماسىندا قوستى: ەگەر باسقا دا توزىعى جەتكەن كوپقاباتتى ۇيلەردىڭ تۇرعىندارى رەنوۆاسياعا قوسىلعىسى كەلسە، نىساندار ءتىزىمى كەڭەيتىلۋى مۇمكىن.