شىمكەنتتە جاڭا اينالما اۆتوموبيل جولىنىڭ قۇرىلىسىن باستاۋعا ارنالعان كاپسۋلا سالۋ ءراسىمى ءوتتى. ماگيسترال ترانزيتتىك جانە اۋىر جۇك كولىكتەرىن قالا شەگىنەن شىعارىپ، وڭتۇستىك ءوڭىر ءۇشىن جاڭا كولىك باعىتىن قالىپتاستىرۋعا مۇمكىندىك بەرەدى، دەپ حابارلايدى infohub.kz سايتى.
جوبانى BI Engineering & Construction قۇرامىنا كىرەتىن «كازاحدورستروي» جانە «ابك-اۆتودور» كومپانيالارىنىڭ كونسورسيۋمى جۇزەگە اسىرادى. تولىق مالىمەتتى جوبا ۇيلەستىرۋشىلەرى ءبولىستى.
شىمكەنت جۇڭگو مەن ورتالىق ازيا ەلدەرىن، سونداي-اق «باتىس ەۋروپا – باتىس جۇڭگو» حالىقارالىق ءدالىزىن بايلانىستىراتىن ءىرى كولىك باعىتتارىنىڭ قيىلىسىندا ورنالاسقان. الايدا تولىققاندى اينالما جولدىڭ بولماۋى ترانزيتتىك كولىكتىڭ ءبىر بولىگىنىڭ قالا ارقىلى وتۋىنە اكەپ سوعادى.
جاڭا اينالما جول ترانزيتتىك كولىككە شىمكەنتكە كىرمەي-اق ءوز باعىتىمەن جۇرۋگە مۇمكىندىك بەرەدى. بۇل قالالىق جول جەلىسى مەن نەگىزگى كىرەبەرىستەردەگى جۇكتەمەنى ازايتىپ، اۋىر جۇك كولىكتەرىنىڭ قالا شەگىندە بولۋىن قىسقارتادى.
«اينالما جول تەك شىمكەنت ءۇشىن عانا ەمەس، بۇكىل وڭتۇستىك ءوڭىردىڭ كولىك جۇيەسى ءۇشىن ماڭىزدى. جاڭا باعىت نەگىزگى باعىتتار اراسىنداعى بايلانىستى ىڭعايلى ەتىپ، لوگيستيكا، ءوندىرىس جانە جول بويى سەرۆيسىن دامىتۋعا قوسىمشا مۇمكىندىكتەر بەرەدى. مەردىگەر رەتىندە ءبىزدىڭ مىندەتىمىز – وسى اۋقىمدى ينفراقۇرىلىمدىق جوبانى تولىق كولەمدە جۇزەگە اسىرۋ»، – دەدى جوبا جەتەكشىسى قۋانىش المۇحامبەتوۆ.
جوبا EPC-كونتراكت – Engineering، Procurement and Construction (ينجينيرينگ، ساتىپ الۋ جانە قۇرىلىس) بويىنشا جۇزەگە اسىرىلۋدا. بۇل – مەردىگەر جوبالاۋ، قاجەتتى ماتەريالدار مەن جابدىقتاردى ساتىپ الۋ، قۇرىلىس جۇرگىزۋ جانە دايىن نىساندى تاپسىرىس بەرۋشىگە تاپسىرۋ ءۇشىن جاۋاپ بەرەتىن «كىلت استىندا» فورماتى.
جاڭا جول ىرگەلەس اۋماقتاردى دامىتۋعا جاعداي جاسايدى. باعىت بويىمەن لوگيستيكالىق جانە وندىرىستىك الاڭدار، قويمالار، تەرمينالدار مەن جول بويى سەرۆيسى نىساندارى پايدا بولۋى مۇمكىن. جوبا «شيحو» حالىقارالىق لوگيستيكالىق جانە ترانسشەكارالىق ورتالىعىن دامىتۋمەن دە بايلانىستى.
ەكونوميكالىق تيىمدىلىك قۇرىلىس كەزەڭىنەن باستاپ-اق بايقالادى. جوبا قۇرىلىس ماتەريالدارىنا، تەحنيكا مەن كولىك قىزمەتتەرىنە سۇرانىس قالىپتاستىرىپ، ينجەنەرلىك-تەحنيكالىق جانە جۇمىسشى پەرسونالىن جۇمىسپەن قامتاماسىز ەتەدى. جول ىسكە قوسىلعاننان كەيىن لوگيستيكا، ساۋدا، ءوندىرىس جانە جول بويى سەرۆيسى قوسىمشا مۇمكىندىكتەرگە قول جەتكىزەدى.