شىمكەنتتىك ايەل سوت ارقىلى ءوز اتىنان بەرىلگەن سەنىمحاتتار مەن تۇرعىن ءۇي مەن جەر ۋچاسكەسىنىڭ جانە پاتەردىڭ ساتىپ الۋ-ساتۋ شارتتارىن جارامسىز دەپ تانىتتى. ول ارەكەت قابىلەتسىزدىگى سالدارىنان ىس-ارەكەتىن تۇسىنبەگەنىن ايتتى، دەپ حابارلايدى infohub.kz.
وقيعا ايەلدىڭ اتىنان رەسىمدەلگەن سەنىمحاتتار بويىنشا جىلجىمايتىن م ۇلىكتىڭ ساتىلۋىنان باستالدى. ناتيجەسىندە ول باسپاناسىز قالىپ، تۋىستارىندا تۇرۋعا ءماجبۇر بولدى.
سوتتا تالاپكەر سەنىمحاتتاردىڭ بەرىلۋ جاعدايىن دا، قۇجاتتارعا قول قويۋ ءساتىن دە ەسىنە تۇسىرە المايتىنىن ايتتى. وعان قوسا، سول كەزەڭدە وبلىستىق پسيحيكالىق دەنساۋلىق ورتالىعىندا ەمدەلگەن.
ءىس بويىنشا جاۋاپكەرلەر ەكى نوتاريۋس جانە ءۇش تۋىس بولدى. ولار سەنىمحاتتاردى الىپ، ايەلدىڭ ءۇيى مەن جەر ۋچاسكەسى جانە پاتەرىنە بيلىك ەتكەن.
شەشۋشى ءرولدى سوت-پسيحياتريالىق ساراپتاما اتقاردى. ماماندار ايەلدىڭ 2019 جىلدان بەرى ەستە ساقتاۋ، ويلاۋ جانە ينتەللەكتۋالدى قابىلەتتەرىنىڭ بۇزىلۋىمەن قاتار جۇرەتىن ورگانيكالىق جەكە باستىڭ بۇزىلۋىمەن اۋىراتىنىن انىقتادى. ساراپشىلاردىڭ قورىتىندىسى بويىنشا، سەنىمحاتتارعا قول قويىلعان كۇنى ول ءوز ىس-ارەكەتىنىڭ ءمانىن تۇسىنە جانە ونى باسقارا الماعان.
بۇل تۇجىرىمدار مەديسينالىق قۇجاتتار، بىرنەشە رەت ەمحاناعا جاتقىزۋ، ديسپانسەرلىك باقىلاۋ جانە كلينيكالىق تەكسەرۋ ناتيجەلەرىمەن راستالدى.
«شىمكەنت قالاسىنىڭ اۋدانارالىق ازاماتتىق ىستەر جونىندەگى سوتى ءىستى قاراۋ بارىسىندا جاۋاپكەرلەر ايەلدەن سەنىمحاتتار الىپ، ونىڭ اتىنان ارەكەت ەتىپ، وعان تيەسىلى جىلجىمايتىن م ۇلىككە بيلىك ەتكەنىن انىقتادى، سونىڭ سالدارىنان تالاپكەر باسپاناسىنان ايىرىلىپ، تۋىستارىندا تۇرۋعا ءماجبۇر بولدى»، – دەپ اتاپ ءوتتى سوتتا.
سوڭىندا تاراپتار باستاپقى قالپىنا قايتارىلدى، ال ايەلدىڭ م ۇلىكتىك قۇقىقتارى قالپىنا كەلتىرىلدى. شەشىم زاڭدى كۇشىنە ەندى.