شىمكەنتتە بۇرەكتىڭ قاتەرلى ىسىگىن العاش رەت مۇزداتۋ ارقىلى جويدى: قالاعا تمد جانە ازيا ەلدەرىنەن كەلگەن حيرۋرگتەر مەن راديولوگتار ونكولوگيانى ەمدەۋدىڭ وزىق ادىستەرىن تالقىلاۋعا جينالدى. حالىقارالىق شەبەرلىك ساعاتىنىڭ باستى وقيعاسى — قالادا تۇڭعىش رەت جاسالعان كريوابلياسيا پروسەدۋراسى، دەپ حابارلايدى infohub.kz سايتى.
دارىگەرلەر وتە تومەن تەمپەراتۋرانىڭ كومەگىمەن بۇيرەك ىسىگىن ءساتتى جويدى.
شەبەرلىك ساعاتىنا سانكت-پەتەربۋرگتەگى ن. ن. پەتروۆ اتىنداعى ۇلتتىق مەديسينالىق ونكولوگيا زەرتتەۋ ورتالىعىنىڭ جەتەكشى ونكولوگتارى، ۋلان-باتورداعى جاپون-موڭعول ۋنيۆەرسيتەتتىك كلينيكاسىنىڭ ماماندارى، سەۋلدەن كەلگەن ينتەرۆەنسيالىق راديولوگتار، سونداي-اق وزبەكستان مەن قىرعىزستاننىڭ جەتەكشى ونكوورتالىقتارىنىڭ حيرۋرگتەرى قاتىستى.
سونىمەن قاتار فرانسيا مەن اۆستراليانىڭ ونكولوگتارى شەبەرلىك ساعاتىنا ونلاين قوسىلدى.
پروسەدۋرانىڭ وزىنە كەلسەك، ونكولوگتاردىڭ ايتۋىنشا، بۇل — ىسىك ءتىنىن تومەن تەمپەراتۋرانىڭ اسەرىمەن جوياتىن از ءينۆازيۆتى ءادىس. ودان بولەك، سەگىز ناۋقاسقا زاماناۋي از ءينۆازيۆتى تەحنولوگيالار قولدانىلىپ، ەم جۇرگىزىلدى.
كريوابلياسيا قالاي جاسالادى
وتا بارىسىندا زاقىمدالعان ايماققا تەسىك نەمەسە جىڭىشكە كاتەتەر ارقىلى كريوزوند نەمەسە كريوباللون ەنگىزىلەدى. ول ارقىلى سالقىنداتقىش زات، مىسالى سۇيىق ازوت، بەرىلەدى. سودان كەيىن تىندەگى تەمپەراتۋرا -80 °س-تان تومەن ءتۇسىپ، پاتوگەندى جاسۋشالار جويىلادى.
مۇزداتىلعان جەردە قورعانىش تىرتىق پايدا بولادى، ول دۇرىس ەمەس يمپۋلستەردىڭ ءوتۋىن بوگەيدى نەمەسە ىسىكتىڭ ءوسۋىن توقتاتادى.
جالپى كەزدەسۋ اياسىندا شەتەلدىك جانە جەرگىلىكتى ماماندار 15 كۇردەلى از ءينۆازيۆتى وتا جاسايدى.
بۇعان دەيىن دەنساۋلىق ساقتاۋ ءمينيسترى اقمارال ءالنازاروۆاعا الماتىدا روبوت-حيرۋرگتەر ونكولوگيانى ەمدەۋدى قالاي وزگەرتىپ جاتقانى تۋرالى ايتىلعان بولاتىن.