شىمكەنتتەگى ءبىرىنشى قالالىق كلينيكالىق اۋرۋحانانىڭ حيرۋرگتارى بۇيرەك جەتكىلىكسىزدىگىنىڭ سوڭعى ساتىسىنداعى ناۋقاسقا بۇيرەك ترانسپلانتاسياسىن جاسادى. ناۋقاس كوپ جىل بويى گەمودياليز اپپاراتىنا تاۋەلدى بولعان. ورگان تۋىس بولىپ كەلەتىن دونوردان الىندى، دەپ حابارلايدى infohub.kz سايتى.
مەگاپوليستىڭ دەنساۋلىق ساقتاۋ باسقارماسى ناقتىلاعانداي، ناۋقاستىڭ نەگىزگى دياگنوزى — تۋبۋلوينتەرستيسيالدى نەفريتتەن دامىعان سوزىلمالى تەرمينالدىق بۇيرەك جەتكىلىكسىزدىگى.
وپەراسيا الدىندا ەكى ناۋقاس تا مۇقيات مەديسينالىق تەكسەرۋدەن ءوتىپ، بارلىق قاجەتتى قۇجاتقا قول قويدى. ترانسپلانتاسيا ءساتتى ءوتتى، ءقازىر دونور مەن رەسيپيەنت دارىگەرلەردىڭ باقىلاۋىندا رەانيماسيادا جاتىر.
دارىگەرلەردىڭ ايتۋىنشا، ەكى ناۋقاستىڭ دا جاعدايى تۇراقتى، بارلىق ومىرلىك كورسەتكىشتەرى قالىپتى. ترانسپلانتاسيالانعان بۇيرەك ءوز مىندەتىن ءساتتى اتقارىپ، ءتيىستى دەڭگەيدە جۇمىس ىستەپ تۇر. ناۋقاستار مامانداردىڭ قاداعالاۋىمەن قاجەتتى ەم قابىلداۋدى جالعاستىرۋدا.
شىمكەنت اكىمدىگىنىڭ مالىمەتىنشە، بۇل — شىمكەنتتىك حيرۋرگتار جاساعان 255ء-شى ءساتتى بۇيرەك ترانسپلانتاسياسى.
بۇعان دەيىن دەنساۋلىق ساقتاۋ مينيسترلىگى حابارلاعانداي، جىل باسىنان بەرى قازاقستاندا 132 ىقتيمال قايتىس بولعاننان كەيىنگى دونور انىقتالدى. وسى كەزەڭدە دارىگەرلەر بارلىعى 205 ترانسپلانتاسيا جاسادى. بولەك اتاپ وتۋگە تۇرارلىق جايت — مۋلتيورگاندى دونورلىقتىڭ 13 جاعدايى. قازا تاپقان ادامداردىڭ ورگاندارى 42 ءومىردى ساقتاپ قالدى: حيرۋرگتار 14 بۇيرەك، 11 جۇرەك، توعىز رەت باۋىر، ءتورت وكپە جانە ءتورت قاساڭ قابىقتى ترانسپلانتاسيالادى.
«كۋرسيۆ» بۇعان دەيىن استانادا ءبىر دونوردىڭ ۇزاق ۋاقىت كەزەكتە تۇرعان ءۇش قازاقستاندىققا ءومىر سىيلاعانىن جازعان. ءبىر دونورلىق پروسەسس اياسىندا ءۇش ناۋقاسقا ترانسپلانتاسيالاۋ ءۇشىن جۇرەك، وكپە جانە باۋىر الىندى.