شىمكەنتتە 65 جاستاعى ەر ادام كورشىسىمەن بولعان توبەلەستەن كەيىن قازا تاپتى. داۋ ءۇيىنىڭ قاقپاسىنىڭ الدىنا قويىلعان كولىككە بايلانىستى تۋىنداعان، دەپ حابارلايدى infohub.kz سايتى.
كۇندىز حۋرسانبەك تۇرسىنقۇلوۆ نەمەرەلەرىمەن ۋاقىت وتكىزگەن، ال كەشكە تۋىستارىنا ونىڭ قازا تاپقانىن حابارلاعان. قاقتىعىس ءساتى بەينەباقىلاۋ كامەراسىنا ءتۇسىپ قالعان.
الدىن الا دەرەكتەرگە سايكەس، 39 جاستاعى كورشىسى زەينەتكەردىڭ قاقپاسىنىڭ الدىنا كولىگىن قويعان. ءۇي يەسى وعان ەسكەرتۋ جاساۋعا شىققان. اۋىزشا ايتىس توبەلەسكە ۇلاسىپ، ەر ادام بىرنەشە سوققى الىپ، اسفالتقا قۇلاعان. بارلىعى ونىڭ التى جاسار نەمەرەسىنىڭ كوزىنشە بولعان.
«سوققىدان كەيىن ول قۇلادى، ال ول كەتىپ قالدى. كەيىن جولدىڭ ورتاسىنا جەتكەندە، تىنىش قايتا ورالىپ، ۇيدە تۇرعان كونديسيونەردى الىپ، ءوز ۇيىنە كىردى، قاقپانى اشتى. ونىڭ ءۇيى ارعى جاقتا، ال كولىگىن وسىندا، وسى جاققا قويعىسى كەلدى. سودان ۇرىسىپ، ۇنەمى جانجالداساتىن»، — دەدى قازا تاپقان ادامنىڭ تۋىسى اينيسا جاپپارقۇلوۆا.
جەرگىلىكتى تۇرعىنداردىڭ ايتۋىنشا، كۇدىكتى بۇرىن دا كورشىلەرىمەن جانجالداسقان. ولار سونداي-اق ونى بىرنەشە رەت ماس كۇيىندە كورگەندەرىن ايتادى.
«جامان ادام. مىنەزى جانجالقوي. الكوگول جانە باسقا دا زاتتاردى قولدانادى. سوندىقتان كوپشىلىك ونىمەن ءتىل تابىسا المادى»، — دەدى جەرگىلىكتى تۇرعىن باحادىر يسلاموۆ.
وقيعا ورنىنا كەلگەن دارىگەرلەر زەينەتكەردىڭ قازا تاپقانىن راستادى. كۇدىكتى وقيعادان كەيىن كوپ ۇزاماي ۇستالدى.
«العان دەنە جاراقاتتارىنان زارداپ شەگۋشى وقيعا ورنىندا قازا تاپتى. كۇدىكتى ءىزىن سۋىتپاي انىقتالىپ، ۇستالدى»، — دەدى شىمكەنت قالاسى پد كريمينالدىق پوليسيا باسقارماسى باستىعىنىڭ ورىنباسارى نۇرلىبەك الىبەك ۇلى.
تەرگەۋ تاعايىندالعان ساراپتامالاردىڭ قورىتىندىسىن كۇتۋدە. ولار الىنعاننان كەيىن ۇستالعان ادامنىڭ ارەكەتتەرىنە قۇقىقتىق باعا بەرىلەدى. قازا تاپقان ادامنىڭ تۋىستارى وبەكتيۆتى تەرگەۋ جۇرگىزۋدى جانە كىنالىنى جاۋاپكەرشىلىككە تارتۋدى تالاپ ەتەدى.