شىمكەنتتەگى دوستىق كوشەسىندە بەس جۇپ ەگىز تۇرادى. ولاردىڭ ون بالاسى بىر-بىرىنە جاقىن ورنالاسقان ۇيلەردە دۇنيەگە كەلگەن. ەڭ كىشىلەرى مەكتەپكە ەندى دايىندالىپ جاتسا، ۇلكەندەرى ءوز وتباسىن قۇرىپ ۇلگەرگەن. بۇل ەرەكشە وقيعا تۋرالى Kursiv LifeStyle حابارلادى، دەپ جازادى infohub.kz.
Otyrar.kz مالىمەتىنشە، ەڭ كىشى ەگىزدەر ايبار مەن ايدارعا ءقازىر ءتورت جاس. اتا-اناسى بالالارىن ناعىز باتىر بولىپ ءوسسىن دەگەن تىلەكپەن وسىلاي اتاعان. سىرتتاي ۇقساس بولعانىمەن، مىنەزدەرى مۇلدەم بولەك: ءبىرى سابىرلى ءارى تىنىش، ەكىنشىسى تەنتەك ءارى ۇرىنشاق.
تاعى ءبىر جۇپ — مانشۇك پەن ءاليا مەكتەپتى بىتىرگەن. ەكەۋى دە ۆولەيبولمەن اينالىسىپ، جارىستارعا قاتىسىپ، جۇلدەلى ورىندارعا يە بولعان. دەگەنمەن، قىزداردىڭ قىزىعۋشىلىقتارى ءارتۇرلى: مانشۇك بالا كەزىنەن سۋرەت سالۋعا اۋەس، شىعارماشىلىق بايقاۋلارعا قاتىسقان، ال ءاليا شەت تىلدەرىن جاقسى كورەدى.
كوشەدەگى ەڭ ۇلكەن ەگىزدەر — ايگۇل مەن اسەل. ەكەۋى دە 25 جاستا، وتباسىن قۇرىپ، جەكە تۇرىپ جاتىر. قىزدار بالا كەزىنەن مۋزىكامەن اينالىسىپ، ونەرگە قىزىققان.
ولاردىڭ وتباسىندا ەگىزدەر سيرەك ەمەس ەكەن. ايگۇل مەن اسەلدىڭ ارعى اجەسى 16 بالا دۇنيەگە اكەلگەن، ونىڭ ءۇش رەتىندە ەگىز بولعان. اكەلەرى قانات قالتاي ۇلى بالا كەزىندە قىزدارىن اجىراتۋ قيىن بولعانىن ەسكە الادى.
وسى ءۇش جۇپتان باسقا، كوشەدە تاعى ەكى جۇپ ەگىز تۇرادى. ءبىرى بالاباقشاعا بارادى، ال فاتيما مەن زۋحرا ەسىمدى قىزدار باستاۋىش سىنىپتا وقيدى.
شىمكەنت — قازاقستاندا ەگىزدەر مەن ۇشەمدەر ءجيى تۋاتىن ايماقتاردىڭ ءبىرى. 2024 جىلدىڭ العاشقى التى ايىندا قالادا 151 ەگىز جانە ءۇش ۇشەم دۇنيەگە كەلگەن.
بۇعان دەيىن «كۋرسيۆ» قازاقستاندا ەكى مىڭعا جۋىق وتباسىندا ەگىزدەر دۇنيەگە كەلگەنىن جازعان.