شىمكەنتتە اليمەنت بويىنشا بورىشكەر جەكە سوت ورىنداۋشىسىنىڭ وعان 14 ملن تەڭگەدەن استام قارىز ەسەپتەگەن قاۋلىلارىنا سوتقا شاعىمداندى. تالاپ قاناعاتتاندىرىلدى، ءبىراق ءىشىنارا، دەپ حابارلايدى infohub.kz سايتى.
شىمكەنت سوتتارىنىڭ رەسمي Telegram-ارناسىندا جازىلعانداي، قالالىق مامانداندىرىلعان اۋدانارالىق اكىمشىلىك سوتى بورىشكەردىڭ جەكە سوت ورىنداۋشىسىنا قاتىستى شىعارىلعان قاۋلىلاردى داۋلاۋ تۋرالى اكىمشىلىك ءىسىن قارادى.
سوت تالقىلاۋ بارىسىندا جەكە سوت ورىنداۋشىسىنىڭ اليمەنت بويىنشا 14 ملن تەڭگەدەن استام سوماعا قارىزدى ايقىنداۋ تۋرالى قاۋلى شىعارعانىن انىقتادى. سونىمەن قاتار ول قامتاماسىز ەتۋ شارالارىن قولداندى: بورىشكەردىڭ جىلجىمالى جانە جىلجىمايتىن م ۇلىكتەرىنە تىيىم سالدى، سونداي-اق كولىك قۇرالدارىن ۇستاۋ جانە قازاقستان رەسپۋبليكاسىنىڭ شەگىنەن شىعۋىن شەكتەۋ تۋرالى قاۋلىلار شىعاردى.
تالاپ قويۋشى قارىزدىڭ ەسەبىمەن كەلىسپەي، جەكە سوت ورىنداۋشىسى داۋلى كەزەڭدەگى ونىڭ ناقتى تابىستارى مەن زەينەتاقى اۋدارىمدارىن ەسكەرمەگەنىن مالىمدەدى. وسىنى نەگىزگە الا وتىرىپ، ول شىعارىلعان بارلىق قاۋلىلاردىڭ كۇشىن جويۋدى سۇرادى.
ءىس ماتەريالدارى مەن زەينەتاقى اۋدارىمدارى تۋرالى مالىمەتتەردى زەردەلەي كەلە، سوت قارىز سوماسىن ايقىنداۋ كەزىندە ەسەپ بورىشكەردىڭ ناقتى تابىسىن ەسەپكە الماي، دۇرىس جۇرگىزىلمەگەن دەگەن قورىتىندىعا كەلدى. تالاپ قويۋشىنىڭ قۇقىقتارى مەن زاڭدى مۇددەلەرىن قالپىنا كەلتىرۋ ءۇشىن قارىزدى قايتا ەسەپتەۋ قاجەت. وسىعان بايلانىستى قارىزدى ايقىنداۋ تۋرالى قاۋلى زاڭسىز دەپ تانىلىپ، كۇشى جويىلدى.
م ۇلىككە تىيىم سالۋ، كولىك قۇرالدارىن ۇستاۋ جانە شىعۋعا شەكتەۋ قويۋ تۋرالى تالاپتار بولىگىندە سوت تالاپ قويۋدان باس تارتتى. سوت تۇسىندىرگەندەي، اليمەنت بويىنشا قارىزدىڭ بار ەكەندىگى راستالعان، ال جەكە سوت ورىنداۋشىسى قولدانعان قامتاماسىز ەتۋ شارالارى سوت اكتىسىن ورىنداۋعا باعىتتالعان.
تۇبىندە سوت شەشىمىمەن تالاپ قويۋ ءىشىنارا قاناعاتتاندىرىلدى. شەشىم زاڭدى كۇشىنە ەندى.