شىمكەنتتەگى قىلمىستىق ىستەر جونىندەگى سوت القاسى نۇراي سەرىكبايدى ولتىرگەنى ءۇشىن سوتتالعان شەرحان ايماحاننىڭ ءىسىن اپەللياسيالىق تارتىپپەن قاراپ، ۇكىمدى وزگەرىسسىز قالدىردى، دەپ حابارلايدى infohub.kz سايتى.
شىمكەنت سوتتارىنىڭ رەسمي Telegram-ارناسىندا جازىلعانداي، اپەللياسيالىق ساتى ايماحانعا قاتىستى قىلمىستىق ءىستى زەردەلەدى. بۇعان دەيىن ءبىرىنشى ساتىداعى سوت ونى قىلمىستىق كودەكستىڭ 99-بابىنىڭ 2-بولىگىنىڭ 5-تارماعىمەن (ەرەكشە قاتىگەزدىكپەن ءولتىرۋ)، قىلمىستىق كودەكستىڭ 115-1-بابىمەن (ستالكينگ) جانە قىلمىستىق كودەكستىڭ 125-1-بابىنىڭ 1-بولىگىمەن (نەكەگە تۇرۋعا ماجبۇرلەۋ) كىنالى دەپ تانىعان. قىلمىستاردىڭ جيىنتىعى بويىنشا وعان ءومىر بويى باس بوستاندىعىنان ايىرۋ جازاسى تاعايىندالعان.
جابىرلەنۋشىنىڭ ازاماتتىق تالاپ-ارىزى ءىشىنارا قاناعاتتاندىرىلدى: سوتتالعان ادامنان 25 ميلليون تەڭگە مورالدىق زيان وتەماقىسى، سونداي-اق ادۆوكات قىزمەتى ءۇشىن 5 ميلليون تەڭگە ءوندىرىلدى. ۇكىممەن كەلىسپەگەن جابىرلەنۋشى مەن سوتتالعان ادامنىڭ ادۆوكاتتارى ونى اپەللياسيالىق تارتىپپەن شاعىمداندى.
جابىرلەنۋشى تاراپ اپەللياسيالىق شاعىمىندا مورالدىق زيان سوماسىن 25 ميلليون تەڭگەدەن 10 ميلليارد تەڭگەگە دەيىن ۇلعايتۋدى سۇرادى. سوتتالعان ادامنىڭ قورعاۋشىلارى ءوز شاعىمدارىندا سوت ۇكىمىن وزگەرتىپ، ايماحاندى قىلمىستىق كودەكستىڭ 125-1-بابىنىڭ 1-بولىگىمەن (ستالكينگ) اقتاۋدى، قىلمىستىق كودەكستىڭ 99-بابىنىڭ 1-بولىگىمەن (ءولتىرۋ) كىنالى دەپ تانىپ، وعان ءادىل جازا تاعايىنداۋدى سۇرادى.
پروكۋرور ۇكىمدى وزگەرىسسىز، ال اپەللياسيالىق شاعىمداردى قاناعاتتاندىرۋسىز قالدىرۋدى سۇرادى.
القا ءىستى قاراپ، ايماحاننىڭ كىنالىلىگى تۋرالى ءبىرىنشى ساتىداعى سوتتىڭ تۇجىرىمدارىمەن كەلىستى جانە ۇكىمدى جويۋعا نەمەسە وزگەرتۋگە نەگىز تاپپادى. وسىعان بايلانىستى 2026 جىلعى 24 قىركۇيەكتەگى قاۋلىمەن ۇكىم وزگەرىسسىز قالدىرىلدى. سوت اكتىسى زاڭدى كۇشىنە ەندى.
ەسكە سالايىق، قايعىلى وقيعا 11 قاڭتاردا شىمكەنتتە بولعان. ءولتىرۋ، ستالكينگ جانە نەكەگە تۇرۋعا ماجبۇرلەۋ ايىبىمەن سوت تورىندە شەرحان ايماحان جاۋاپ بەردى. 13 تامىزدا ول ءومىر بويى باس بوستاندىعىنان ايىرۋ جازاسىن الدى. كەيىن سوتتالعان ادام اپەللياسيالىق شاعىم بەرگەنى بەلگىلى بولدى.