شىمكەنتتە كوپقاباتتى ءۇيدىڭ پودەزىندە سەگىز جاسار قىزعا قول سۇققانى ءۇشىن بۇرىن تەك ايىپپۇلمەن قۇتىلعان ەر ادامنىڭ ۇكىمى قايتا قارالدى، دەپ حابارلايدى infohub.kz سايتى.
ەسكە سالايىق، ماۋسىم ايىندا شىمكەنتتە پودەزدە سەگىز جاسار قىزعا شابۋىل جاسادى دەپ ايىپتالعان 56 جاستاعى ەر ادامعا قاتىستى سوت وتكەن بولاتىن. ول قىزدى اشىق تۇردە ۇستاپ، ءسۇيىپ، ءوز ۇيىنە الىپ كەتپەك بولعان. الايدا قىز قاشىپ قۇتىلىپ كەتكەن. سوندا ەر ادام نەبارى 216 مىڭ تەڭگە ايىپپۇل تولەپ، بوستاندىققا شىققان.
كەيىن پروكۋراتۋرا ۇكىمگە شاعىمداندى. سوت القاسى ءبىرىنشى ساتىداعى سوتتىڭ شەشىمىن جويىپ، ءىس ماتەريالدارىن تەرگەۋ ساتىسىنا قايتاردى.
تەلەارنانىڭ دەرەگىنشە، ايىپپۇل تۋرالى شەشىم قوعامدا كەڭ رەزونانس تۋدىرعان. مىنە، ءۇش ايدان كەيىن ءىس قايتا قارالدى. سوت شەشىمىمەن سوتتالۋشى تۇرمەدە 7،5 جىل وتكىزەدى.
«جابىرلەنۋشىنىڭ پايداسىنا 3 ملن تەڭگە مورالدىق زيان ءوندىرىلدى»، — دەپ قوستى شىمكەنت سوتىنىڭ ءباسپاسوز قىزمەتى.
سوت ۇكىمى زاڭدى كۇشىنە ەنگەن جوق.