شىمكەنتتە جاۋاپكەرشىلىگى شەكتەۋلى سەرىكتەستىك 135،6 ملن تەڭگەنى ءوندىرىپ الۋ تۋرالى اتقارۋشىلىق جازباعا داۋ ايتۋعا تىرىستى، الايدا كاسساسيالىق ساتى بۇل ىسكە نۇكتە قويدى، دەپ حابارلايدى infohub.kz سايتى.
«كاسساسيالىق سوتتاردىڭ وزەكتى جاڭالىقتارى» Telegram-ارناسىندا حابارلانعانداي، ازاماتتىق ىستەر جونىندەگى كاسساسيالىق سوت شىمكەنتتەگى ج ش س پەن نوتاريۋس اراسىنداعى باسقا ج ش س پايداسىنا قارىزدى ءوندىرىپ الۋ تۋرالى اتقارۋشىلىق جازبانىڭ زاڭدىلىعىنا قاتىستى داۋدى قارادى.
2025 جىلعى 2 قازاندا نوتاريۋس جشس-تەن 135 602 820 تەڭگە كولەمىندەگى قارىزدى ءوندىرىپ الۋ تۋرالى اتقارۋشىلىق جازبا جاسادى. نەگىز رەتىندە تاراپتار قول قويعان جەتكىزۋ شارتى، جۇكقۇجات جانە ءوزارا ەسەپ ايىرىسۋ اكتىسى الىندى.
ج ش س نوتاريۋستىڭ ارەكەتىنە شاعىمدانىپ، قارىز داۋلى ەكەنىن جانە اتقارۋشىلىق جازبا اۋماقتىق قاعيدالاردى بۇزا وتىرىپ جاسالعانىن كورسەتتى.
ءبىرىنشى ساتىداعى سوت شاعىمدى قاناعاتتاندىرۋدان باس تارتتى. اپەللياسيالىق ساتى شەشىمدى وزگەرىسسىز قالدىردى. كاسساسيالىق شاعىمدا ءوتىنىش بەرۋشى جەتكىزىلگەن تاۋاردىڭ سانىنا قاتىستى داۋ بار ەكەنىن جانە نوتاريۋستىڭ اۋماقتىق قاعيدانى بۇزعانىن العا تارتىپ، سوت اكتىلەرىن جويۋدى سۇرادى.
كاسساسيالىق سوت تومەنگى ساتىلاردىڭ تۇجىرىمدارىمەن كەلىسىپ، سوت اكتىلەرىن كۇشىندە قالدىردى.
كاسساسيالىق سوت نوتاريۋسقا ۇسىنىلعان قۇجاتتار قارىزدىڭ داۋسىزدىعىن راستاعانىن اتاپ ءوتتى. اتاپ ايتقاندا، ەسەپ ايىرىسۋ اكتىسى مەن جۇكقۇجاتقا ج ش س ديرەكتورى ەلەكتروندىق سيفرلىق قولتاڭبامەن قول قويعان، بۇل زاڭ بويىنشا قولتاڭبانىڭ وزىنە تەڭ. سونىمەن قاتار، ج ش س 2025 جىلعى 31 قازانعا دەيىن جەتكىزىلگەن تاۋار ءۇشىن قارىزدى تولىق وتەۋ مىندەتتەمەسى تۋرالى كەپىلدىك حات جىبەرگەن.
جەتكىزىلگەن تاۋاردىڭ سانىنا قاتىستى داۋ بار دەگەن دالەلدەر ءتيىستى دالەلدەمەلەرمەن راستالماعان. سونداي-اق اۋماقتىق قاعيدانىڭ بۇزىلۋى انىقتالماعان: شارت شىمكەنتتە جاسالعان، وندا ونى ورىنداۋ كەزەڭىندە ءجشس-تىڭ تۇراقتى ارەكەت ەتەتىن ورگانى ورنالاسقان.
وسىلايشا، نوتاريۋستىڭ ارەكەتتەرىن زاڭسىز دەپ ساناۋعا نەگىز جوق. 2025 جىلعى 26 قاراشاداعى اۋدانارالىق سوتتىڭ ازاماتتىق ىستەر جونىندەگى شەشىمى جانە 2026 جىلعى 18 اقپانداعى سوت القاسىنىڭ ازاماتتىق ىستەر جونىندەگى قاۋلىسى وزگەرىسسىز قالدىرىلدى، كاسساسيالىق شاعىم قاناعاتتاندىرۋسىز قالدىرىلدى.