شىمكەنتتەگى Ontustik Construction قۇرىلىس كومپانياسى 2025 جىلدى 3،2 ملن تەڭگە تازا شىعىنمەن اياقتادى، دەپ حابارلايدى infohub.kz.
ءبىر جىل بۇرىن كاسىپورىن 1،75 ملرد تەڭگە تازا پايدا تاپقان ەدى. قارجىلىق ناتيجەنىڭ تومەندەۋى قۇرىلىس جۇمىستارى كولەمىنىڭ كۇرت قىسقارۋىنا بايلانىستى بولدى.
جىل ىشىندە Ontustik Construction كىرىسى 22،98 ملرد تەڭگەدەن 5،14 ملرد تەڭگەگە دەيىن، ياعني شامامەن 4،5 ەسەگە ازايدى. ورىندالعان جۇمىستاردىڭ وزىندىك قۇنى 20،06 ملرد تەڭگەدەن 4،32 ملرد تەڭگەگە دەيىن تومەندەسە، جالپى پايدا 2،92 ملرد تەڭگەدەن 814 ملن تەڭگەگە دەيىن قۇلدىرادى.
كومپانيانىڭ اكىمشىلىك شىعىندارى 1،03 ملرد تەڭگەنى، ال باسقا دا شىعىندار 376،7 ملن تەڭگەنى قۇرادى. ناتيجەسىندە كاسىپورىن 2024 جىلعى 1،60 ملرد تەڭگە وپەراسيالىق پايدانىڭ ورنىنا 613،2 ملن تەڭگە وپەراسيالىق شىعىنعا ۇشىرادى.
سالىق تولەگەنگە دەيىنگى وڭ كورسەتكىشكە (191،4 ملن تەڭگە) جەتۋگە كومپانياعا 812،8 ملن تەڭگە كولەمىندەگى قارجىلىق كىرىستەر كومەكتەستى، الايدا كورپوراتيۆتىك تابىس سالىعى بويىنشا 194،6 ملن تەڭگە شىعىن قورىتىندى ەسەپتى مينۋسقا شىعاردى.
Ontustik Construction كومپانياسىنىڭ جالعىز قاتىسۋشىسى — General Contractors Group جەكە كومپانياسى، ول بىرنەشە زاڭدى تۇلعالار ارقىلى ايدىن راقىمباەۆقا تيەسىلى.
Forbes جۋرنالىنىڭ 2026 جىلعى مامىرداعى دەرەگى بويىنشا، راقىمبايەۆ قازاقستاننىڭ ەڭ باي بيزنەسمەندەرى رەيتينگىندە 1،1 ملرد دوللار بايلىعىمەن 9-ورىندا تۇر. ول قازاقستاندا جانە شەتەلدە تۇرعىن ءۇي، ونەركاسىپ جانە ينفراقۇرىلىم جوبالارىن جۇزەگە اسىراتىن BI Group ينۆەستيسيالىق-قۇرىلىس حولدينگىنىڭ نەگىزگى اكسيونەرى بولىپ تابىلادى.
بۇعان دەيىن «كۋرسيۆ» ميللياردەر راقىمباەۆتىڭ شىمكەنتتىك كومپانياسى 2024 جىلى كىرىستى توعىز ەسەگە ارتتىرعانىن جازعان ەدى.