سيدنەيدىڭ شىعىسىندا 14 جاسار قىزعا قاتىستى جىنىستىق زورلىق جاسادى دەگەن كۇدىكپەن جەكە مەكتەپتىڭ ءۇش وقۋشىسى ايىپتالدى. بۇل تۋرالى infohub.kz سايتى حابارلايدى.
پوليسيا وتكەن ايدا ءجاسوسپىرىم قىزدىڭ سيدنەيدىڭ شىعىس اۋداندارىنداعى اللەيادا زورلىققا ۇشىراعانى تۋرالى حابارلامادان كەيىن تەرگەۋ باستادى. بەيسەنبى كۇنى تاڭەرتەڭ بىرنەشە ۇيگە ءتىنتۋ جۇرگىزىلىپ، بىرنەشە ەلەكتروندى قۇرىلعى تاركىلەنىپ، ساراپتاماعا جىبەرىلدى.
ءتىنتۋ كەزىندە پوليسيا ەكى مۋلياج تاپانشا، Glock ستيلىندەگى BB مىلتىق، ءۇش لازەرلىك كورسەتكىش جانە ۇرلانعان دەپ ەسەپتەلەتىن ءنومىر بەلگىسىن تاپتى. ءۇش وقۋشى دا ۇستالىپ، قاماۋعا الىندى.
پوليسيانىڭ مالىمەتىنشە، ەكى ۇل باسقالارمەن بىرگە اۋىرلاتىلعان جىنىستىق زورلىق پەن جىنىستىق سيپاتتاعى ارەكەتتەرگە قاتىستى ەكى ايىپپەن، ال ءۇشىنشىسى وسى ايىپتاردىڭ بىرىمەن ايىپتالدى. ۇشەۋى دە قاتاڭ شارتتارمەن كەپىلگە بوساتىلىپ، وسى ايدىڭ سوڭىندا كامەلەتكە تولماعاندار ءىسى جونىندەگى سوتقا كەلۋى ءتيىس.
ءۇش وقۋشى دا سيدنەيدەگى ەڭ كونە ءارى قىمبات ۇلدار مەكتەبى — The Scots College-دە وقيدى، مۇندا جىلدىق وقۋ اقىسى 47 000 دوللارعا دەيىن جەتەدى. مەكتەپ ءوز مالىمدەمەسىندە «ساباق ۋاقىتىنان تىس بولعان وقيعادان» حاباردار ەكەنىن جانە پوليسيامەن ىنتىماقتاسىپ جاتقانىن ايتتى.
«مەكتەپ بۇل ماسەلەنى بايىپپەن قاراستىرىپ، ىنتىماقتاستىق تانىتتى... پوليسيا تەرگەۋىنىڭ ءوز باعىتىمەن ءجۇرۋى ماڭىزدى دەپ سانايمىز، سوندىقتان بۇل ماسەلەگە قاتىستى ودان ءارى تۇسىنىكتەمە بەرۋ ورىنسىز»، — دەلىنگەن مەكتەپ مالىمدەمەسىندە.