اتىراۋ وبلىسىنداعى پوليەتيلەن وندىرەتىن Silleno زاۋىتىنىڭ قۇرىلىس الاڭىنا بيىكتىگى 101،8 مەتر ەتيلەن فراكسيالاۋ كولونناسى ورناتىلدى. قۇرىلىمنىڭ ديامەترى 7،5 مەتر، سالماعى 1،8 مىڭ توننادان اسادى. بۇل تۋرالى Kazenergy قاۋىمداستىعى قازمۇنايگازعا سىلتەمە جاساپ حابارلادى، دەپ جازادى infohub.kz سايتى.
كولوننانى قازاقستاندا — «اتىراۋنەفتەماش» زاۋىتىندا جاساپ شىعاردى. ول پيروليز قوندىرعىسىنىڭ نەگىزگى ەلەمەنتتەرىنىڭ بىرىنە اينالىپ، پوليەتيلەن ءوندىرۋدىڭ باستى شيكىزاتى — ەتيلەندى ءبولىپ الۋعا پايدالانىلادى.
قۇرىلىمدى مونتاجداۋعا جۇك كوتەرگىشتىگى 4 مىڭ توننا گۋسەنيسالى كران مەن 1،7 مىڭ توننالىق قوسالقى كران جۇمىلدىرىلدى. ينجەنەرلىك وپەراسيا شامامەن بەس ساعاتقا سوزىلدى.
جوبانى ىسكە اسىرۋدىڭ جالپى ۇلەسى 30%-دىق جوسپارمەن سالىستىرعاندا 38،5%-عا جەتتى. قۇرىلىس الاڭىندا 5 مىڭعا جۋىق ادام مەن 500-دەن استام ارنايى تەحنيكا جۇمىس ىستەپ جاتىر.
بۇعان دەيىن اتىراۋ وبلىسىندا جىلىنا 1،25 ملن توننا پوليەتيلەن شىعاراتىن زاۋىت سالىپ جاتقان Silleno كومپانياسى 2024 جىلدىڭ قورىتىندىسى بويىنشا 2،1 ملرد تەڭگە شىعىنعا ۇشىراعانى بەلگىلى بولدى. 2023 جىلى بۇل كورسەتكىش 1 ملرد تەڭگە ەدى.
قۇنى 7،4 ملرد دوللارلىق ينۆەستيسيالىق جوبا پوليەتيلەن وندىرۋگە شيكىزات رەتىندە تەڭىز كەن ورنىنىڭ گازىن پايدالانۋدى كوزدەيدى.
زاۋىتتى ىسكە قوسۋ 2029 جىلعا جوسپارلانعان. اتىراۋداعى كاسىپورىن جوبالىق قۋاتىنا شىعاتىن 2030–2031 جىلدارى قازاقستاندا پوليەتيلەن تۇتىنۋ قازىرگى 190 مىڭ توننادان كەمىندە 260–270 مىڭ تونناعا دەيىن ارتادى.