قازاقستان رەسپۋبليكاسى سىرتقى ىستەر مينيسترلىگىنىڭ رەسمي وكىلى جانبولات ۋسەنوۆ ۆەدومستۆوداعى بريفينگتە شەتەلگە شىعاتىن قازاقستاندىقتارعا ءبىرقاتار كەڭەس بەردى، دەپ حابارلايدى infohub.kz سايتى.
جانبولات ۋسەنوۆ قازاقستان ازاماتتارىنىڭ شەتەلدە بىرنەشە رەت قيىن جاعدايعا تاپ بولعانىن، وعان باراتىن ەلدىڭ زاڭدارىن بىلمەۋ، شەتەلدىك مەملەكەتتەردىڭ ميگراسيالىق، ۆيزالىق، ترانزيتتىك جانە كەدەندىك تالاپتارىن ساقتاماۋ نەمەسە بىلمەۋ سەبەپ بولعانىن اتاپ ءوتتى.
ەڭ ءجيى كەزدەسەتىن ماسەلەلەر — قازاقستاندىقتاردىڭ بولۋ مەرزىمىن بۇزۋى، تىيىم سالىنعان نەمەسە دەكلاراسيالانباعان تاۋارلاردى وتكىزۋ ارەكەتتەرى، سونداي-اق شەتەلدىك مەملەكەتتەردەگى ترانزيت جانە بولۋ ەرەجەلەرىن ساقتاماۋى.
«شەتەلگە شىعار الدىندا وتانداستارىمىزدى باراتىن ەلدىڭ، سونداي-اق ترانزيتتىك مەملەكەتتەردىڭ زاڭناماسىن، ۆيزالىق جانە ميگراسيالىق تالاپتارىن مۇقيات زەردەلەۋگە شاقىرامىز. پاسپورتتاردىڭ، ۆيزالاردىڭ، بولۋعا رۇقساتتاردىڭ جانە وزگە دە قۇجاتتاردىڭ قولدانىلۋ مەرزىمىنە ەرەكشە نازار اۋدارۋ قاجەت. سونىمەن قاتار مەديسينالىق ساقتاندىرۋدى راسىمدەۋدى، اۆيابيلەتتەردى تەك رەسمي سەرۆيستەر ارقىلى ساتىپ الۋدى، اۆياكومپانيالاردىڭ باگاج جانە ترانزيت تالاپتارىن ساقتاۋدى، قۇجاتتارىڭىزدى ءۇشىنشى تۇلعالارعا بەرمەۋدى، سونداي-اق ىشىندەگىسىن ناقتى بىلمەيتىن بوتەن سومكەلەردى، سالەمدەمەلەردى جانە وزگە دە جىبەرىلىمدەردى تاسىمالداۋعا الماۋدى ۇسىنامىز»، — دەدى ق ر ءسىم وكىلى.
شەتەلگە جۇمىسقا، وقۋعا نەمەسە ەمدەلۋگە شىعاتىن ازاماتتارعا بارلىق قاجەتتى قۇجاتتاردى، شاقىرتۋلاردى، ەڭبەك كەلىسىمشارتتارىن جانە رۇقساتتاردى راسىمدەۋدىڭ زاڭدىلىعىن الدىن الا تەكسەرۋ ۇسىنىلدى.
«جاپپاي ساپارلاردى ۇيىمداستىرۋشىلارمەن كەلىسىمدەردى تەكسەرۋ، سونداي-اق توتەنشە جاعدايلارعا ارنالعان ءىس-قيمىلداردى جوسپارلاۋ وتە ماڭىزدى. مىسال رەتىندە جاقىندا اقش-تا 200-گە جۋىق قازاقستاندىق ستۋدەنت باسپاناسىز قالعان رەزونانستىق جاعدايدى اتاپ وتۋگە بولادى»، — دەپ قوستى ۋسەنوۆ.
سونىمەن قاتار قازاقستاننىڭ ديپلوماتيالىق جانە كونسۋلدىق مەكەمەلەرى ازاماتتارعا ءوز قۇزىرەتى شەگىندە قاجەتتى كومەك كورسەتەتىنى اتاپ ءوتىلدى. الايدا باراتىن ەلدىڭ زاڭناماسىن ساقتاۋ جانە بەلگىلەنگەن تالاپتاردى ورىنداۋ جاۋاپكەرشىلىگى تىكەلەي ازاماتتىڭ وزىندە.