قازاقستان رەسپۋبليكاسىنىڭ سىرتقى ىستەر مينيسترلىگى بۇقارالىق اقپارات قۇرالدارىندا جاريالانعان، وتانداستارىمىزدىڭ ەلگە ورالۋعا كومەك سۇراعان وتىنىشتەرىنە جاۋاپ بەردى، دەپ حابارلايدى infohub.kz سايتى.
ۆەدومستۆو باق-تا قازاقستان ازاماتتارىنىڭ وتانعا ورالۋعا كومەكتەسۋ تۋرالى وتىنىشتەرى تارالىپ جاتقانىن اتاپ ءوتتى.
«سىرتقى ىستەر مينيسترلىگى بۇل جاعدايعا بارىنشا بايىپتى قارايدى. قازاقستان ازاماتتارىنىڭ شەتەلدەگى قۇقىقتارىن، بوستاندىقتارى مەن زاڭدى مۇددەلەرىن قورعاۋ — مينيسترلىك قىزمەتىنىڭ ءسوزسىز باسىم باعىتى»، — دەلىنگەن حابارلامادا.
قازاقستان رەسپۋبليكاسىنىڭ ءسىم الەمنىڭ ءتۇرلى ەلدەرى مەن ايماقتارىنداعى جاۋىنگەرلىك ايماقتاردان وتانداستاردى قايتارۋدىڭ پراكتيكالىق تاجىريبەسى بار ەكەنى اتاپ ءوتىلدى.
«وسىعان بايلانىستى قازاقستان ازاماتتارى تۋرالى تولىق ءارى ناقتى اقپاراتتى بۇقارالىق اقپارات قۇرالدارىنان ەمەس، ولاردىڭ وزدەرىنەن نەمەسە تۋىستارىنان تىكەلەي الۋ اسا ماڭىزدى. كەيبىر وتباسىلار كومەك كورسەتۋ تۋرالى وتىنىشتەرىمەن مينيسترلىككە جۇگىنىپ ۇلگەردى»، — دەدى ۆەدومستۆو وكىلدەرى.
جاۋىنگەرلىك ايماقتا قالىپ قويعان قازاقستاندىقتاردىڭ تۋىستارىنىڭ وتىنىشتەرىن قابىلداۋ ءۇشىن مينيسترلىكتە ارنايى جەدەل جەلى جۇمىس ىستەيدى.
«بۇقارالىق اقپارات قۇرالدارىنان ءتيىستى بايلانىس دەرەكتەرىن تاراتۋعا كومەكتەسۋلەرىن سۇرايمىز. ازاماتتاردىڭ قۇقىقتىق قورعالۋىن قامتاماسىز ەتۋ ماقساتىندا مينيسترلىككە تەگى مەن ءاتى-جونى، تۋعان كۇنى، بولجامدى ورنالاسقان جەرى، سونداي-اق ولار جاساسقان ەڭبەك كەلىسىمشارتتارىنىڭ شارتتارى تۋرالى مالىمەتتەردى قوسا العاندا، جان-جاقتى اقپارات قاجەت»، — دەلىنگەن مالىمدەمەدە.
قازاقستاندىقتاردى وتانعا قايتارۋ جونىندەگى بىرلەسكەن شارالاردى ازىرلەۋ ماقساتىندا ءسىم رەسەيلىك تاراپپەن كونسۋلتاسيالاردى جالعاستىرىپ جاتقانى اتاپ ءوتىلدى.
«بۇگىن قازاقستان رەسپۋبليكاسىنىڭ سىرتقى ىستەر ءمينيسترى رەسەي فەدەراسياسىنىڭ قازاقستان رەسپۋبليكاسىنداعى ۋاقىتشا سەنىمدى وكىلىمەن كەزدەسۋ وتكىزدى. جۋىق ارادا قازاقستان رەسپۋبليكاسىنىڭ رەسەي فەدەراسياسىنداعى ەلشىسى رەسەي فەدەراسياسىنىڭ سىرتقى ىستەر مينيسترلىگى مەن قورعانىس مينيسترلىگىنىڭ باسشىلىعىمەن كەزدەسۋلەر وتكىزەدى. جۇرگىزىلىپ جاتقان جۇمىستىڭ بارىسى مەن ناتيجەلەرى تۋرالى قوسىمشا حابارلاناتىن بولادى»، — دەپ قوستى ۆەدومستۆو.