سينگاپۋر بيلىگى تۋۋ دەڭگەيىن ارتتىرۋدىڭ ەرەكشە جولىن تاپتى: ەلدە جۇپ ىزدەۋگە ارنالعان مەملەكەتتىك سەرۆيس جۇمىسىن باستادى. ونى حالىق «مەملەكەتتىك Tinder» دەپ اتاپ ۇلگەردى. FirstDate دەپ اتالعان سەرۆيستى مەملەكەتتىك تەحنولوگيالىق GovTech Singapore كومپانياسى ازىرلەگەن، دەپ حابارلايدى infohub.kz سايتى.
ءقازىر پلاتفورما سىناق رەجيمىندە جۇمىس ىستەپ تۇر — وعان 21 مەن 35 جاس ارالىعىنداعى مەملەكەتتىك قىزمەتشىلەر قول جەتكىزە الادى. تىركەلۋ Singpass جۇيەسى ارقىلى جۇزەگە اسادى، ول قازاقستاندىق Egov-تىڭ بالاماسى. قاتىسۋشىلار وزدەرىنىڭ قىزىعۋشىلىقتارى، ادەتتەرى، قۇندىلىقتارى جانە قارىم-قاتىناستاعى قالاۋلارى تۋرالى ساۋالناما تولتىرادى.
ادەتتەگى تانىسۋ قوسىمشالارىنان وزگەشە، مۇندا ميلليونداعان ساۋالنامانى شەكسىز سۆايپتاۋ جوق. پايدالانۋشىلاردىڭ قالاۋىن ەسكەرەتىن الگوريتم ءبىر الەۋەتتى سەرىكتەستى تاڭدايدى. سايكەستىك تابىلعان سوڭ ەكى قاتىسۋشى دا SMS الىپ، تانىسۋدى جالعاستىرعىسى كەلە مە، جوق پا — شەشۋگە 72 ساعات ۋاقىت الادى.
Economic Times جازۋىنشا، مەملەكەت شىعىننىڭ ءبىر بولىگىن ءتىپتى وتەۋى مۇمكىن. FirstDate-تە Date Quest اتتى ارنايى فۋنكسيا قاراستىرىلعان: جۇپتارعا بىرلەسكەن تاپسىرما ورىنداۋ ۇسىنىلادى، مىسالى، بۇرىن جەپ كورمەگەن تاعامىن ءدامىن تاتۋ. وسى ءۇشىن قاتىسۋشىلار ءۇشىنشى تاراپ سەرىكتەسىنىڭ ۆاۋچەرىن الا الادى.
«الايدا ونىڭ مولشەرى مەن سانى اكسيا شارتتارىمەن شەكتەلگەن، سوندىقتان سەرۆيس تولىق تەگىن كەشكى اسقا كەپىلدىك بەرمەيدى»، — دەپ اتاپ ءوتتى باسىلىم.
GovTech سونداي-اق پايدالانۋشىلاردىڭ دەرەكتەرى مونەتيزاسيالانبايتىنىن جانە ءۇشىنشى تاراپتارعا بەرىلمەيتىنىن مالىمدەدى.
بۇعان دەيىن Kursiv LifeStyle تۋۋدىڭ رەكوردتىق تومەندەۋىنە بايلانىستى ەل بيلىگى اتا-انالارعا مەملەكەتتىك كومەكتى ۇلعايتقانىن جازعان. 17 جاسقا دەيىنگى ءار بالاعا مەملەكەت شامامەن 70 مىڭ سينگاپۋر دوللارىن (شامامەن 25،4 ملن تەڭگە) ءبولۋدى جوسپارلاپ وتىر.