سينگاپۋرداعى فرانسۋز ستۋدەنتى دىدە گاسپار وۋەن ماكسيميليەن (19) اپەلسين شىرىنى ساۋىتتارىنىڭ بىرىنەن ساباندى جالاپ، ونى قايتا ورنىنا سالعانى ءۇشىن 600 سينگاپۋر دوللارى (شامامەن 465 اقش دوللارى نەمەسە 348 فۋنت ستەرلينگ) مولشەرىندە ايىپپۇل تولەۋگە مىندەتتەلدى، دەپ حابارلايدى infohub.kz سايتى.
سينگاپۋردا وقيتىن ماكسيميليەن ءبىر قوعامدىق تارتىپسىزدىك جاسادى دەگەن ايىپپەن ءوز كىناسىن مويىندادى. ول سابان جالاعان ۆيدەوسىن Instagram-دا "قالا ءقاۋىپسىز ەمەس" دەگەن جازۋمەن جاريالاعان. بۇل ۆيدەو كوپتەگەن ادامداردىڭ جيىركەنىشىن تۋدىردى، كەيىن ءبىر قاۋىمداستىق پاراقشاسىندا تاراتىلىپ، جەرگىلىكتى ب ا ق نازارىنا ىلىكتى.
ساۋىت يەسى iJooz كومپانياسى ماكسيميليەننىڭ ارەكەتىنەن كەيىن اۆتوماتتاعى بارلىق 500 ساباندى اۋىستىرعانىن حابارلادى. سينگاپۋردا قوعامدىق تارتىپسىزدىك ءۇشىن ەڭ جوعارى 2000 سينگاپۋر دوللارىنا دەيىن ايىپپۇل، ءۇش ايعا دەيىن باس بوستاندىعىنان ايىرۋ نە ەكەۋى دە قاراستىرىلعان. ايىپتاۋشى دا، قورعاۋشى دا ماكسيميليەنگە ايىپپۇل سالۋدى سۇراعان.
قورعاۋشى ادۆوكاتتىڭ سوزىنشە، ماكسيميليەن بۇل جاعداي ءۇشىن شىن وكىنىپ، وعان سول كەزدە جەڭىل ويىن ساناعان ىس-ارەكەتتىڭ اۋىر سالدارعا اكەلگەنىن تۇسىنەدى. ءبىر ستاكان سىعىلعان اپەلسين شىرىنىن 2 سينگاپۋر دوللارىنا ساتاتىن iJooz اۆتوماتتارى سينگاپۋردىڭ ساۋدا اۋداندارىندا، تەمىرجول ستانسيالارىندا جانە تۇرعىن ءۇي كەشەندەرىندە كەڭ تارالعان. Channel News Asia-نىڭ حابارلاۋىنشا، ماكسيميليەن 12 ناۋرىزدا بوكس جاتتىعۋىنان كەيىن قالانىڭ ەڭ باي اۋداندارىنىڭ بىرىندەگى Goldhill Centre-دە ورنالاسقان iJooz اۆتوماتىنان ساباندى جالاعان.