سينگاپۋردا سوت 19 جاستاعى جەرگىلىكتى تۇرعىندى الەۋمەتتىك جەلىدە ۇشاقتىڭ بومبالانعانى تۋرالى جالعان حابارلاما جاريالاعانى ءۇشىن شارتتى تۇردە سوتتادى. وقيعا بىلتىرعى شىلدەدە بولعان، جىگىت Scoot اۋە كومپانياسىنىڭ رەيسىمەن ۇشۋ الدىندا ينتەرنەتتە ءوزى وتىرعان اۋە كەمەسىن جارۋ نيەتى تۋرالى ءازىل-وسپاق جازبا جاريالاعان، دەپ حابارلايدى infohub.kz سايتى.
بۇل جازبا بىردەن قۇقىق قورعاۋ ورگاندارى مەن چانگي اۋەجايىنىڭ قاۋىپسىزدىك قىزمەتتەرىنىڭ نازارىن اۋداردى. لاينەر ارنايى تۇراققا جىبەرىلىپ، بارلىق جولاۋشىلار مەن ەكيپاج مۇشەلەرى ساپەرلەر مەن قىزمەتتىك يتتەردىڭ قاتىسۋىمەن مۇقيات تەكسەرۋ ءۇشىن شۇعىل ەۆاكۋاسيالاندى. تەكسەرۋ ناتيجەسىندە بورتىنان ەشقانداي جارىلعىش قۇرىلعى نەمەسە ءقاۋىپتى زات تابىلمادى.
سوت وتىرىسىندا ايىپتالۋشى كىناسىن تولىق مويىنداپ، وكىنگەنىن ءبىلدىردى، ول قىلمىس جاساۋدى جوسپارلاماعانىن جانە ءوز جازباسىن زيانسىز ءازىل دەپ ساناعانىن ءتۇسىندىردى. سوت ونىڭ جاسىن جانە كىناسىن مويىنداعانىن ەسكەرىپ، مىندەتتى قوعامدىق جۇمىستاردى ورىنداي وتىرىپ، سىناق مەرزىمىن تاعايىندادى.