سينگاپۋردىڭ جوعارعى سوتى ۇندىلىك لوگيستيكالىق كومپانيانىڭ باس ديرەكتورى چاندەر اگارۆالدىڭ بۇرىنعى سۇيىكتى قىزىنان سىيلىقتارى ءۇشىن 370 مىڭ دوللار ءوندىرىپ الۋ تۋرالى ارىزىن قاناعاتتاندىرمادى، دەپ حابارلايدى infohub.kz سايتى.
چاندەر اگارۆال فەليسيا ليمەن 2022–2023 جىلدارى ارالاسقان. ول كەزدە ايەل ۇشاقتا ستيۋاردەسسا بولىپ جۇمىس ىستەپ، جولداسىنان الدەقايدا از تابىس تاپقان. ماحاببات كەزەڭىندە ەر ادام وعان Hermes، Dior جانە Prada ماركالى زاتتار سىيلاپ، ۇشاقتىڭ ءبىرىنشى كلاسس بيلەتتەرىن ساتىپ الىپ بەرگەن.
قىمبات سىيلىقتاردان بولەك، ۇندىلىك كاسىپكەر قىزدىڭ پاتەرىن «ۇيلەسىمگە كەلتىرۋ» ءۇشىن فەن-شۋي مامانىنىڭ قىزمەتىنە مىڭداعان دوللار جۇمساعان. سونىمەن قاتار ول ونىڭ جەكە شىعىندارىن، ساقتاندىرۋىن جانە ۋنيۆەرسيتەتتەگى وقۋ اقىسىن تولەپ وتىرعان.
ايىرىلىسقاننان كەيىن اگارۆال وسى شىعىنداردىڭ بارلىعىن قارىز دەپ تانۋدى تالاپ ەتىپ، سوتقا جۇگىندى. سىيلىقتار مەن جۇمسالعان قاراجاتتىڭ جالپى قۇنىن ول 370 مىڭ دوللار دەپ باعالادى، دەپ حابارلايدى CNN.
الايدا سينگاپۋردىڭ جوعارعى سوتى ارىزدى قابىلدامادى. سۋديا چاندەر مەن فەليسيانىڭ مەسسەندجەرلەردە بەلسەندى حات جازىسقانىن، ءبىراق وندا ايەلدىڭ زاتتار مەن اقشانى قارىزعا العانىن دالەلدەيتىن دەرەك جوق ەكەنىن اتاپ ءوتتى.