سيريانىڭ بۇرىنعى پرەزيدەنتى باشار اساد پەن ونىڭ ءىنىسى ماحەر اسادقا قاتىستى سوت ۇكىمى شىقتى. داماسك سوتى ولاردى 14 جىلعا سوزىلعان قاقتىعىس كەزىندە ادامزاتقا قارسى قىلمىستار مەن سوعىس قىلمىستارى ءۇشىن سىرتتاي ءولىم جازاسىنا كەستى. بۇل قاقتىعىس سالدارىنان جارتى ميلليونعا جۋىق ادام قازا تاپقان ەدى، دەپ حابارلايدى infohub.kz سايتى.
سول ءىس بويىنشا اسادتىڭ نەمەرە تۋىسى اتەف نادجيب تە ءولىم جازاسىنا كەسىلدى. ول ەلدىڭ وڭتۇستىگىندەگى داراا پروۆينسياسىنداعى كوتەرىلىستى باسۋعا جەتەكشىلىك ەتكەنى ءۇشىن ايىپتالدى. ءدال وسى وقيعا كەيىن ازاماتتىق سوعىسقا ۇلاستى. نادجيب قاۋىپسىزدىك شارالارى كۇشەيتىلگەن جاعدايدا، تۇرمە كيىمىن كيىپ، توردىڭ ىشىندە تۇرىپ، سۋديانىڭ ۇكىمىن تىڭدادى.
اساد پەن ونىڭ ءىنىسى ماحەر 2024 جىلدىڭ جەلتوقسانىندا كوتەرىلىسشىلەر داماسكىگە كىرگەننەن كەيىن رەسەيگە قاشىپ كەتكەن بولاتىن. ال نادجيب كەيىن ۇستالىپ، سوتقا تارتىلعان ەڭ جوعارى لاۋازىمدى تۇلعالاردىڭ بىرىنە اينالدى. ول سيريا ارمياسىنىڭ بۇرىنعى بريگادا گەنەرالى، 2011 جىلى اساد تۇسىندا داراا پروۆينسياسىنداعى ساياسي قاۋىپسىزدىك باسقارماسىنىڭ باسشىسى بولعان.