كاليفورنياداعى Six Flags Magic Mountain ويىن-ساۋىق ساياباعى جۇزدەگەن ادام مي جاراقاتىن العانىن العا تارتقاننان كەيىن تانىمال X2 اتتراكسيونىن ءبىرجولا جاباتىنىن حابارلادى، دەپ جازادى infohub.kz سايتى.
ساياباقتىڭ باستى تارتىمدارىنىڭ ءبىرى سانالعان X2-گە كەزەك ۇزاق تۇراتىن، ال ورىندىقتارى 360 گرادۋسقا اينالاتىن. ول شىلدە ايىنان بەرى جابىق تۇر.
Six Flags اتتراكسيوننىڭ ءبىرقاتار قاۋىپسىزدىك سىناعىنان وتكەنىن مالىمدەدى. دەگەنمەن كومپانيا ونى «دۇرىس شەشىم» دەپ ەسەپتەگەندىكتەن توقتاتۋعا بەل بۋدى.
بۇل شەشىم X2-گە مىنگەن جۇزدەگەن ادام مي جاراقاتىن الدى دەگەن سوت ىستەرى مەن بۇقارالىق اقپارات قۇرالدارىنىڭ حابارلارىنان كەيىن قابىلداندى. تالاپكەرلەردىڭ ءبىر بولىگىن قورعايتىن زاڭ فيرماسى شەشىم ءوز كليەنتتەرى ءۇشىن «تىم كەش» قابىلدانعانىن ايتتى.
سەيسەنبى كۇنى جابىلۋدى جاريالاعان Six Flags Magic Mountain ساياباعىنىڭ پرەزيدەنتى برايان وەردينگ: «اتتراكسيون قاۋىپسىزدىگى — ءبىزدىڭ بيزنەسىمىزدىڭ نەگىزى. قوناقتاردىڭ سەنىمىنە نۇقسان كەلگەنىن بايقاساق، وعان بايىپپەن قارايمىز»، — دەدى.
ساياباققا قارسى ازاماتتىق سوت ىستەرىن قوزعاعان Dordick Law Corporation فيرماسى جۇزدەگەن ادامنىڭ حابارلاسقانىن، ولاردىڭ جاراقاتتارىن وسى اتتراكسيوننان العانىن ايتقانىن مالىمدەدى.
«ولار X2-گە اسەر الۋعا ءمىندى. ال ورنىنان اۋىر مي جاراقاتىمەن تۇردى. كەيبىرەۋى شۇعىل مي وپەراسياسىن جاساتۋعا ءماجبۇر بولدى. تاعى بىرەۋلەرى بۇرىنعى ومىرىنە ورالۋ ءۇشىن ءالى كۇرەسىپ ءجۇر»، — دەدى فيرما ءوز مالىمدەمەسىندە.
زاڭ فيرماسى اتتراكسيوننىڭ جابىلۋىن بولاشاق قوناقتاردى قورعاۋ تۇرعىسىنان قۇپتايتىنىن، ءبىراق بۇل «ءقازىردىڭ وزىندە زارداپ شەككەن ادامدارعا ەش پايداسى جوق» ەكەنىن اتاپ ءوتتى.
باستاپقىدا X دەپ اتالعان اتتراكسيون 2002 جىلى اشىلعان، الايدا بىرنەشە ايدان كەيىن جوبالاۋ كەمشىلىكتەرىن جوندەۋ ءۇشىن جابىلعان. كەيىن 2007 جىلى ۆاگوندارىن جەڭىلىرەك نۇسقاسىنا اۋىستىرۋ ءۇشىن تاعى جابىلدى. كەلەسى جىلى X2 دەگەن اتاۋمەن قايتا اشىلىپ، سودان بەرى وعان 16 ميلليوننان استام ادام مىنگەن.
2022 جىلى X2-گە مىنگەننەن كەيىن قايتىس بولعان 22 جاستاعى كريستوفەر ءحوۋليدىڭ وتباسىن قورعاعان زاڭ فيرماسى جابىلۋ جەتكىلىكسىز دەپ سانايدى.
حوۋلي وتباسى «Six Flags اقىرى X2ء-نى جاباتىنىن ەستىپ جەڭىلدەپ وتىرعانىمەن، كريستوفەر ءحوۋليدى جيىرما جىلعا جۋىق ۋاقىت بويى جۇمىس ىستەۋىنە رۇقسات ەتىلگەن ءقاۋىپتى اتتراكسيون ولتىرگەنىن وزگەرتپەيدى» دەيدى. بۇل تۋرالى Wisner Baum LLP فيرماسىنىڭ ادۆوكاتى برەنت ۋيزنەر BBC-گە بەرگەن مالىمدەمەسىندە ايتتى.
ءحوۋليدىڭ وتباسى تاقىرىپتىق ساياباقپەن تامىز ايىندا ابايسىزدا ولىمگە اكەپ سوقتىرۋ تۋرالى سوت ءىسىن بىتىمگەرشىلىكپەن شەشتى.
«بۇل قايعىنى قايتارىپ الۋ مۇمكىن ەمەس»، — دەدى ۋيزنەر زاڭ رەفورماسىن، الدىن الا رەتتەۋدى جانە ءتيىستى مەملەكەتتىك قاداعالاۋدى تالاپ ەتىپ.
«جەتكىلىكتى ادام زارداپ شەككەننەن كەيىن عانا دۇرىس ارەكەت جاساۋدى پايداعا باعىتتالعان كورپوراسيالارعا سەنىپ قالماۋىمىز كەرەك. X2 ورنىنا كەلەتىن نارسە ءقاۋىپسىز بولسىن دەپ ۇمىتتەنەمىز»، — دەپ قوستى ول.