قازاقستاننىڭ اۋىل شارۋاشىلىعى مينيسترلىگى سيىر ەتى باعاسىنىڭ كۇرت ءوسۋىن كۇتپەيدى. قازىرگى تاڭدا ەلىمىز بويىنشا بۇل ەتتىڭ ورتاشا باعاسى شامامەن 3،8 مىڭ تەڭگە، ال استانادا كەيبىر بازارلاردا باعا 4،5 مىڭ تەڭگەگە دەيىن جەتەدى، دەپ حابارلايدى infohub.kz سايتى.
بريفينگتە جۋرناليستەر ەت باعاسىنىڭ قىمباتتاۋىنا نازار اۋدارىپ، جاقىن ارادا باعا قالاي وزگەرەتىنىن سۇرادى. اۋىل شارۋاشىلىعى ۆيسە-مينيسترى نازگۇل حاتەپوۆانىڭ ايتۋىنشا، ۆەدومستۆو بازارلارداعى ءونىم باعاسىن كۇن سايىن باقىلاپ وتىرادى.
«ەت باعاسىنا كەلەتىن بولساق، بۇگىنگى ستاتيستيكالىق دەرەكتەر بويىنشا رەسپۋبليكا بويىنشا سيىر ەتىنىڭ ءبىر كەلىسىنىڭ ورتاشا باعاسى — 3 800 تەڭگە. استانادا دا 3 800-دەن 4 000-عا دەيىن، ودان جوعارى دا بار. بازارلاردا دا كۇن سايىن مونيتورينگ جۇرگىزىپ وتىرمىز، مىسالى، شاپاعاتتا ەت 3 500 تەڭگە تۇرسا، ارتەمدە شامامەن 4،5 مىڭ تەڭگە»، — دەدى ۆيسە-مينيستر نازگۇل حاتەپوۆا.
اۋىل شارۋاشىلىعى مينيسترلىگىندە باعانىڭ كۇرت وسۋىنە ەشقانداي نەگىز جوق دەپ سانايدى. ۆيسە-مينيستر مۇنى ءوز ءوندىرىسىنىڭ كولەمىمەن جانە مال باسىنىڭ وسۋىمەن ءتۇسىندىردى.
«سونىمەن قاتار، كۇرت وسۋگە ەشقانداي نەگىز كورىپ وتىرعان جوقپىز. ياعني ىشكى نارىق تولىعىمەن ءوز ءوندىرىسىمىزدىڭ ەسەبىنەن قامتاماسىز ەتىلگەن. وتكەن جىلدىڭ قورىتىندىسى بويىنشا 434 مىڭ توننا سيىر ەتىن وندىردىك. بيىلعى جىلدىڭ 8 ايىنىڭ قورىتىندىسى بويىنشا دا ءوندىرىس كولەمىنىڭ ءوسۋىن كورىپ وتىرمىز، مال باسى دا ءوسىپ كەلەدى. سوندىقتان سيىر ەتى باعاسىنىڭ كۇرت وسۋىنە ەشقانداي نەگىز جوق»، — دەپ قوستى حاتەپوۆا.
بۇعان دەيىن «كۋرسيۆ» قازاقستاندا ەت باعاسى 28،6%-عا وسكەنىن جازعان بولاتىن.