قازاقستاندىق تەننيسشى تيموفەي سكاتوۆ سەيسەنبى، 21 شىلدەدە، پورتۋگاليانىڭ ەشتوريل قالاسىندا ءوتىپ جاتقان اتپ 250 سەرياسىنداعى ءتۋرنيردىڭ جەكەلەي سىنىندا "باقىتتى جەڭىلۋشى" (lucky loser) مارتەبەسىن اقتادى، دەپ حابارلايدى inbusiness.kz ءتىلشىسى.
قازىرگى ۋاقىتتا سكاتوۆ اتپ رەيتينگىندە 163ء-شى ورىندا تۇر. جۇلدە قورى 612 مىڭ ەۋرودان اساتىن Millennium Estoril Open ءتۋرنيرىنىڭ جەكەلەي سىنىندا ول ىرىكتەۋ كەزەڭىنەن باستادى. بەسىنشى ءنومىرلى ىرىكتەۋ ويىنشىسى رەتىندە قازاقستاندىق العاشقى كەزدەسۋدە پورتۋگاليالىق جواو دومينگەشتى (الەمدىك رەيتينگتە 591ء-شى) ءۇش سەتتە جەڭىپ، ىرىكتەۋدىڭ ءتورت فينالىنىڭ بىرىنە جولداما الدى. الايدا جەكسەنبى، 19 شىلدەدەگى فينالدا يسپاندىق پەدرو مارتينەسكە (157ء-شى راكەتكا) 3:6، 2:6 ەسەبىمەن ەكى سەتتە ەسە جىبەرىپ، ءتۋرنيردى اياقتاۋى ءتيىس ەدى.
دەگەنمەن، ۇيىمداستىرۋشىلار سكاتوۆقا ەكىنشى مۇمكىندىك بەرىپ، ونى "باقىتتى جەڭىلۋشى" رەتىندە نەگىزگى تورعا قوستى. ياعني، ىرىكتەۋ فينالىندا جەڭىلگەندەردىڭ ىشىندەگى ەڭ ۇزدىگى رەتىندە تانىلدى. سەيسەنبى كۇنى قازاقستاندىق نەگىزگى توردىڭ ءبىرىنشى اينالىمىندا نيدەرلاند وكىلى يەسپەر دە يونگپەن (98ء-شى راكەتكا) كەزدەستى. بۇل تەننيسشىلەر بۇرىن رەسمي ماچتاردا كەزدەسپەگەن. گوللانديالىق ويىنشى فاۆوريت سانالدى. ءبىرىنشى سەتتە دە يونگ سكاتوۆقا تەك ءبىر گەيم بەردى – 6:1. ەكىنشى پارتيادا دە يونگ 2:0 ەسەبىمەن العا شىقتى، ءبىراق سكاتوۆ تەز ارادا ەسەپتى تەڭەستىرىپ، سەتتى 6:4 ەسەبىمەن جەڭىپ الدى.
وسىلايشا ەكى جاقتىڭ ەسەبى تەڭەستى. جەڭىمپاز ءۇشىنشى پارتيادا انىقتالدى. ونىڭ باسىندا سكاتوۆ قارسىلاسى مەن جانكۇيەرلەرىن تاڭ قالدىرىپ، 5:0 ەسەبىمەن العا شىقتى. گوللانديالىق فاۆوريت ءۇش گەيمدى قايتارىپ العانىمەن، توعىزىنشى گەيمدە قازاقستاندىق پارتياعا (6:3) جانە ماچقا (2:1) نۇكتە قويدى. سكاتوۆ ۇيىمداستىرۋشىلاردىڭ سەنىمىن اقتاپ، نەگىزگى توردىڭ ەكىنشى اينالىمىنا شىقتى. مۇندا سارسەنبى، 22 شىلدەدە (استانا ۋاقىتىمەن 15:00) ول الەمنىڭ 14ء-شى راكەتكاسى، Millennium Estoril Openء-تىڭ ءبىرىنشى ءنومىرلى ويىنشىسى، رەسەيلىك اندرەي رۋبلەۆپەن كەزدەسەدى. رۋبليەۆ ەكىنشى اينالىمعا اۆتوماتتى تۇردە ءوتتى، بۇعان دەيىن سكاتوۆپەن كەزدەسپەگەن.
سول كۇنى، سەيسەنبى، 21 شىلدەدە، اۆستريانىڭ كيسبيۋەل قالاسىندا جۇلدە قورى 612 مىڭ ەۋرودان اساتىن اتپ 250 سەرياسىنداعى Generali Open ءتۋرنيرىنىڭ جەكەلەي سىنى باستالدى. قازاقستاندىق الەكساندر شەۆچەنكو (84ء-شى ورىن) 41ء-شى راكەتكا، التىنشى ءنومىرلى ويىنشى نەمىس يان-لەننارد شترۋففپەن كەزدەستى. بۇل ولاردىڭ 2023 جىلدان بەرى ءۇشىنشى كەزدەسۋى ەدى. الدىڭعى ەكەۋىندە شترۋفف جەڭىسكە جەتكەن، ءۇشىنشى ماچتا دا ول باسىم ءتۇستى – 3:6، 7:6 (7:5)، 6:4. ماچ 1 ساعات 56 مينۋتقا سوزىلدى.
ايتا كەتەيىك، Generali Open-2026 جەكەلەي سىنىنا تاعى ءبىر قازاقستاندىق – الەكساندر بۋبليك (الەمدىك رەيتينگتە 11ء-شى، كيسبيۋەلدە ءبىرىنشى ءنومىرلى ويىنشى) قاتىسادى. بۋبليك العاشقى اينالىمنان اۆتوماتتى تۇردە ءوتىپ، ەكىنشى اينالىمدا 22 شىلدەدە ارگەنتينالىق فاكۋندو دياس اكوستامەن (108ء-شى ورىن) كەزدەسەدى. بۇعان دەيىن بۇل قارسىلاستار كەزدەسپەگەن، ماچ استانا ۋاقىتىمەن 14:00-دە باستالادى.