قازاقستان پرەمەر-مينيسترىنىڭ ءبىرىنشى ورىنباسارى رومان سكليار كولىك ءمينيسترى قىزمەتىنەن كەتكەن مارات قاراباەۆتىڭ وتستاۆكاسىنا بايلانىستى پىكىر ءبىلدىردى. بۇل ماسەلە اقوردادا جۋرناليستەردىڭ سۇراعىنا جاۋاپ بەرۋ كەزىندە كوتەرىلدى.
سكلياردىڭ ايتۋىنشا، قاراباەۆتىڭ وتستاۆكاسىنا ناقتى سەبەپتەر بولعان. اتاپ ايتقاندا، پرەزيدەنت قاسىم-جومارت توقايەۆ قاۋىپسىزدىك كەڭەسىنىڭ وتىرىسىندا كولىك ءمينيسترىنىڭ قىزمەتىن قاتتى سىناعان.
– بۇل شەشىمگە بەلگىلى ءبىر سەبەپتەر بولدى. باسشىلاردا شەشىلۋى ءتيىس مىندەتتەر بولادى. قارابايەۆ مينيسترلىككە جۇكتەلگەن مىندەتتەردىڭ ءبىر بولىگىن ورىندادى. ەندى جاڭا مينيستر الداعى مىندەتتەردى اتقارادى. مەملەكەت باسشىسىنىڭ تاراپىنان وتە قاتتى سىن ايتىلعانىن بىلەسىزدەر. مەنىڭشە، كولىك مينيسترلىگىنىڭ جۇمىسىنا ءالى دە تالداۋ جاساپ، جۇمىس ىستەۋ كەرەك، – دەدى رومان سكليار.
مارات قاراباەۆتىڭ كولىك سالاسىنداعى رەفورمالارى، جول ساپاسى، ترانزيتتىك الەۋەتتى دامىتۋ مەن لوگيستيكا باعىتىنداعى باستامالارى قوعامدا ءتۇرلى پىكىر تۋدىرعان بولاتىن. الايدا مينيسترلىك تاراپىنان ناقتى ناتيجەلەردىڭ بولماۋى، كەشىگۋلەر مەن جۇيەلى ماسەلەلەردىڭ شەشىلمەۋى ونىڭ ورنىن بوساتۋىنا تۇرتكى بولعانى بايقالادى.
پرەزيدەنت توقاەۆتىڭ تىكەلەي سىنى مەن سالالىق ناتيجەلەرگە بايلانىستى مارات قاراباەۆتىڭ وتستاۆكاسى — بيلىك تاراپىنان تيىمدىلىكتى تالاپ ەتۋدىڭ كورىنىسى. الداعى ۋاقىتتا مينيسترلىكتىڭ جۇمىسى تەرەڭ تالداۋعا ءتۇسىپ، جاڭا باسشىدان ناقتى ناتيجەلەر كۇتىلەتىنى انىق.