سولتۇستىك قازاقستان وبلىسىندا ماس ەر ادام قىزمەتتىك كولىكتە ۋچاسكەلىك ينسپەكتورعا پىشاقپەن شابۋىل جاسادى. وقيعا شىلدە ايىنىڭ سوڭىندا قىزىلجار اۋدانىندا، لەبەدكي مەن نالوبينو اۋىلدارى اراسىندا بولعان، دەپ حابارلايدى infohub.kz سايتى.
مالىمەتتەرگە سايكەس، پوليسەي قوعامدىق ورىندا ماس كۇيىندە جۇرگەن ەر ادامدى مەديسينالىق كۋالاندىرۋعا اپارىپ بارا جاتقان. جول ۇستىندە قۇقىق بۇزۋشى كەنەتتەن پىشاق الىپ، ۋچاسكەلىككە شابۋىل جاساعان.
پوليسەي كەسىلگەن جاراقات العانىمەن، شابۋىلداۋشىنىڭ قولىنان پىشاقتى ج ۇلىپ الىپ، كولىكتى توقتاتا العان.
«ۋچاسكەلىك پوليسيا ينسپەكتورى ماس قۇقىق بۇزۋشىنى پوليسيا بولىمىنە جەتكىزۋ كەزىندە كەسىلگەن جاراقات الدى، ول قىزمەتتىك كولىكتە پوليسەيگە شابۋىل جاساعان. وسى فاكتى بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى»، — دەپ حابارلادى سولتۇستىك قازاقستان وبلىسى پوليسيا دەپارتامەنتىنىڭ ءباسپاسوز قىزمەتى.
قىلمىستىق ءىس قىلمىستىق كودەكستىڭ 380-بابىنىڭ 5-بولىگى بويىنشا — بيلىك وكىلىنە قاتىستى ءقاۋىپ ءتوندىرۋ نەمەسە زورلىق ارەكەتتەرى بويىنشا قوزعالدى. قىزمەتتىك مىندەتىن اتقارۋ كەزىندە پوليسەيدىڭ ومىرىنە نەمەسە دەنساۋلىعىنا ءقاۋىپتى زورلىق قولدانعانى ءۇشىن 7 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان.
پوليسيادا قاجەتتى مەديسينالىق كومەك العاننان كەيىن جانە قالپىنا كەلگەن سوڭ ۋچاسكەلىك ينسپەكتور قىزمەتىنە قايتا ورالعانىن قوستى.
بۇعان دەيىن «كۋرسيۆ» الماتىدا «اتاكەنت» كورمە كەشەنىنىڭ جانىندا بالالار توبىنا جاسالعان شابۋىلعا قاتىستى پوليسيا تەرگەۋ باستاعانىن جازعان بولاتىن. زارداپ شەككەندەردىڭ ءبىرىنىڭ اناسىنىڭ ايتۋىنشا، ەر ادام 10 جاسار ۇلدىڭ بەتىنەن ۇرىپ، بالالاردى جازالايمىن دەپ قورقىتقان. كۇدىكتى ۇستالىپ، پوليسياعا جەتكىزىلدى، وقيعانىڭ ءمان-جايى انىقتالىپ جاتىر.