ماسكەۋدە كوميك سەمەن سلەپاكوۆقا قاتىستى شەتەلدىك اگەنت مىندەتتەرىن ورىنداۋدان جالتارۋ ءىسى بويىنشا سوت وتىرىسى سىرتتاي ءوتتى، دەپ حابارلايدى infohub.kz.
ريا ءنوۆوستيدىڭ مالىمەتىنشە، ءىستى ماسكەۋدىڭ لومونوسوۆ اۋدانىنىڭ الەمدىك سۋدياسى قارادى. سلەپاكوۆتىڭ ءوزى سوتقا كەلمەگەن، ءبىراق ادۆوكاتىن جىبەرگەن. ول ارقىلى ءارتىس سوتتان ءىستى توقتاتۋدى سۇراعان.
ادۆوكات: «ول سوتقا بەرگەن وتىنىشىندە ءۇش جىلدان استام ۋاقىت بويى رەسەيدە تۇرمايتىنىن، ەشقانداي حابارلاما الا المايتىنىن كورسەتتى. سونىمەن قاتار، وعان نە ءۇشىن ايىپ تاعىلىپ جاتقانى، قانداي اقپاراتتى تاراتقانى تولىق تۇسىنىكسىز. ول ناقتى تۇجىرىمدالماعان ايىپتان قورعانۋ مۇمكىن ەمەس دەپ سانايدى. ءوزىنىڭ قىلمىستىق قۋدالانۋىن زاڭسىز دەپ، ءىستىڭ توقتاتىلۋىن تالاپ ەتەدى»، — دەدى.
تەرگەۋ دەرەكتەرى بويىنشا، سلەپاكوۆ ءبىر جىل ىشىندە ەكى رەت شەتەلدىك اگەنت قىزمەتىن اتقاراتىن جەكە تۇلعانىڭ قىزمەتىن جۇرگىزۋ ءتارتىبىن بۇزعانى ءۇشىن اكىمشىلىك جاۋاپكەرشىلىككە تارتىلعان (رف اقبتك-نىڭ 19.34-بابىنىڭ 4-بولىگى). سونىمەن قاتار، شەتەلدە ءجۇرىپ، ول الەۋمەتتىك جەلىلەردە شەتەلدىك اگەنت دەگەن بەلگىسىز ماتەريالدار جاريالاۋدى جالعاستىرعان. كوميككە ەكى جىلعا دەيىن باس بوستاندىعىنان ايىرۋ جازاسى ءقاۋىپ ءتونىپ تۇر.
سلەپاكوۆ رەسەيدە 2023 جىلدىڭ ساۋىرىندە شەتەلدىك اگەنت دەپ تانىلعانى ايتىلادى.
ەسكە سالايىق، 9 ساۋىردە سەمەن سلەپاكوۆقا قاتىستى شەتەلدىك اگەنت قىزمەتىن جۇرگىزۋ ءتارتىبىن بۇزعانى ءۇشىن قىلمىستىق ءىس قوزعالعانى بەلگىلى بولدى. جاقىندا رەسەيدىڭ تەرگەۋ كوميتەتى كوميككە قاتىستى تەرگەۋدى اياقتاعانىن مالىمدەدى. ءارتىس ىزدەۋ جاريالاندى.