قازاقستاننىڭ عىلىم جانە جوعارى ءبىلىم مينيسترلىگى تامىزداعى ۇبت-2026 قورىتىندىسىن شىعاردى. تەستىلەۋگە 27 مىڭنان استام تالاپكەر قاتىستى، ونىڭ 53 پايىزى شەكتى بالل جينادى. بەس ءپان بويىنشا ورتاشا ناتيجە 55 بالل، ال ماكسيمالدى كورسەتكىش – 136 بولدى. سونداي-اق تەستىلەۋگە ەرەكشە ءبىلىم بەرۋ قاجەتتىلىكتەرى بار 98 تالاپكەر قاتىستى، دەپ حابارلايدى infohub.kz سايتى.
تامىزداعى ۇبت كەزىندە ەرەجەنىڭ 66 بۇزۋشىلىعى تىركەلدى. ونىڭ 30-ى سمارتفون، شپارگالكا جانە باسقا دا تىيىم سالىنعان زاتتاردى وتكىزۋگە تىرىسقانى ءۇشىن تەستىلەۋگە جىبەرىلمەدى. تاعى 36 ادام ەمتيحان كەزىندە تىكەلەي بۇزۋشىلىق جاساعانى ءۇشىن اۋديتوريادان شىعارىلدى. مينيسترلىكتە بوگدە ادامداردىڭ قاتىسۋ فاكتىلەرى انىقتالماعانىن اتاپ ءوتتى.
ۆەدومستۆو تەكسەرۋ مۇنىمەن اياقتالمايتىنىن ەسكە سالدى. ۇبت اياقتالعاننان كەيىن تەستىلەۋ بەينەجازبالارى 31 قازانعا دەيىن تالدانادى. ماماندار تىيىم سالىنعان زاتتاردى پايدالانۋدى نەمەسە باسقا دا بۇزۋشىلىقتاردى انىقتاسا، تەستىلەۋ ناتيجەلەرى جويىلادى.
كوللەدج تۇلەكتەرى ءوز ماماندىعى بويىنشا اقىلى نەگىزدە جوعارى وقۋ ورنىندا وقۋدى جالعاستىرعىسى كەلسە، اڭگىمەلەسۋ ناتيجەلەرى بويىنشا تۇسە الادى. بۇل جاعدايدا قۇجاتتاردى جوعارى وقۋ ورىندارىنىڭ قابىلداۋ كوميسسيالارى قابىلدايدى.
الدىڭعى كۇنى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك قازاقستاندا ۇزدىكتەر نەلىكتەن گرانتسىز قالاتىنىن ءتۇسىندىردى.