رەپەر سنۋپ دوگگ تۋرالى «سنۋپ» اتتى ءومىرباياندىق فيلم 2027 جىلى 6 تامىزدا الەمدىك پروكاتقا شىعادى، دەپ حابارلايدى infohub.kz.
Deadline دەرەگىنشە، فيلم «R» (ەرەسەكتەرگە ارنالعان) رەيتينگىنە يە بولادى. بۇل Universal ستۋدياسى مەن ءانشىنىڭ وزىنە تيەسىلى Death Row Pictures كومپانياسىنىڭ العاشقى بىرلەسكەن جوباسى. رەجيسسەر – «تارزان. اڭىز»، «كەتي پەرري: مەنىڭ ءبىر بولىگىم» جانە «مەلوديا يح مەچتى» فيلمدەرىمەن تانىمال كرەيگ بريۋەر. سەناريدى دجو روبەرت كوۋل جازعان. جاس سنۋپ دوگگتى «سىرتقى جاعالاۋلار» سەريالىنان بەلگىلى دجوناتان دەۆيسس سومدايدى. پروديۋسەرلەر توبىنا سنۋپ دوگگتىڭ ءوزى، Death Row Pictures باسشىسى سارا راماكەر جانە بۇرىن ەمينەم تۋرالى «سەگىزىنشى ميليا» ءفيلمىنىڭ پروديۋسەرى بولعان برايان گرەيزەر كىرگەن.
سيۋجەت 1990-جىلداردىڭ باسىنان باستاپ، ونىڭ Dr. Dre-مەن جۇمىس ىستەپ، العاشقى حيتتەرىن جازعان كەزەڭىن قامتيدى. فيلم قاراپايىم جىگىتتىڭ گانگستا-رەپ يكوناسىنا، تابىستى بيزنەسمەنگە جانە الەمدىك مەدياماگناتقا اينالۋىن باياندايدى. تاسپادا رەپەردىڭ ەڭ تانىمال ترەكتەرى، سونىڭ ىشىندە Drop It Like It’s Hot، Gin and Juice، What’s My Name جانە Nuthin’ but a ‘G’ Thang شىرقالادى. ءتۇسىرىلىم 2026 جىلدىڭ جازىندا باستالادى دەپ جوسپارلانۋدا.
قازاقستاندىق كورەرمەن سنۋپ دوگگتىڭ «كەشYOU» توبىمەن بىرلەسكەن جۇمىسىن ەسىنە الادى. 2024 جىلدىڭ جازىندا ولار Forever Sunday ترەگىنە بىرلەسكەن كليپ ءتۇسىرىپ، وندا رەپەر قازاق شاپانىن كيگەن. پروديۋسەر بايان الاعۇزوۆانىڭ قاتتى ناسيحاتتاۋىنا قاراماستان، بەينەجازبا الەۋمەتتىك جەلىلەردە سالقىن قابىلداندى. كوپتەگەن تىڭدارمان ءاننىڭ ءۇمىتتى اقتاماعانىن جانە ۇلكەن حيتكە اينالماي تەز ۇمىتىلعانىن ايتتى. دەگەنمەن الەمدىك دەڭگەيدەگى ءارتىس قاتىسقان جوبا نازار اۋدارارلىق وقيعا بولدى.
بۇعان دەيىن سنۋپ دوگگتىڭ نەمەرە اعاسى امەريكاندىق رەپەر RBX Spotify-عا قارسى سوت ىسىندە جەڭىلگەنى حابارلانعان ەدى. ول ستريمينگتىك سەرۆيستى تىڭدالىمداردى جاساندى كوبەيتۋمەن كۇرەسپەدى، سونىڭ سالدارىنان باسقا ورىنداۋشىلار تابىستارىنىڭ ءبىر بولىگىن جوعالتتى دەپ ايىپتاعان.