سولتۇستىك قازاقستان وبلىسىندا كوپىر سالۋ كەزىندە ەكى ادامنىڭ جانە ەجەلگى جانۋاردىڭ سۇيەكتەرى تابىلدى — بۇل تۋرالى infohub.kz سايتى حابارلايدى.
سيرەك كەزدەسەتىن ولجا پەتروپاۆل ماڭىنداعى پريبرەجنوە اۋىلىنىڭ جانىنان تابىلعان. ارتەفاكتىلەردى كوپىر سالۋ كەزىندە قۇم كارەرىن ەكسكاۆاتورمەن قازعان جۇمىسشىلار بايقاعان. تابىلعان زاتتاردى جەر بەتىنە شىعارىپ، دەرەۋ پوليسيا قىزمەتكەرلەرىن شاقىرعان.
قۇقىق قورعاۋ ورگاندارى تەكسەرۋ جۇرگىزىپ، قىلمىستىق سيپاتتاعى بەلگىلەر انىقتالماعانىن مالىمدەدى.
سونىمەن قاتار، تاريح عىلىمدارىنىڭ كانديداتى، ارحەولوگ اناتولي پلەشاكوۆ جانۋاردىڭ سۇيەكتەرىن زەرتتەپ ۇلگەردى. الدىن الا دەرەكتەرگە قاراعاندا، تابىلعان سۇيەكتەردىڭ ءبىرى وسى اۋماقتا شامامەن ءبىزدىڭ داۋىرىمىزگە دەيىنگى 12 مىڭجىلدىققا دەيىن ءومىر سۇرگەن ءجۇندى ءمۇيىزتۇمسىققا تيەسىلى. ادام سۇيەكتەرى قاي كەزەڭگە جاتاتىنى ازىرگە بەلگىسىز. سوندىقتان عالىمدار تابىلعان ارتەفاكتىلەردى دە، كارەردىڭ ءوزىن دە تولىعىراق زەرتتەۋدى جوسپارلاپ وتىر.
«ءجۇندى ءمۇيىزتۇمسىق — ءبىز ايتىپ جۇرگەندەي، مامونت فاۋناسى، بۇل پالەوليت كەزەڭى، مۇز ءداۋىرى. ەگەر وسى باس سۇيەكتەردىڭ كەم دەگەندە بىرەۋى سول ۋاقىتقا جاتاتىن بولسا، بۇل اسقان سەنساسيا بولار ەدى. ەگەر مامونت فاۋناسىنىڭ تابىلىمدارى سەنساسيا دەپ ايتىپ جۇرسەم، وندا بۇل اسقان سەنساسيا بولار ەدى. ويتكەنى باس سۇيەكتەردىڭ بىرەۋى قاتتى زاقىمدالعان، سوندىقتان بۇل وتە قىزىق»، — دەيدى ارحەولوگ اناتولي پلەشاكوۆ.