سولتۇستىك قازاقستان وبلىسىندا بولعان اۋىر جول اپاتىنان سەگىز ادام، ونىڭ ىشىندە بالالار زارداپ شەكتى، دەپ حابارلايدى infohub.kz سايتى.
جول اپاتىنىڭ سالدارى الەۋمەتتىك جەلىلەردە جاريالاندى. كادرلاردا زارداپ شەككەن جۇرگىزۋشىنىڭ كولىكتەن بىرنەشە مەتر قاشىقتىقتا جاتقانى، قوزعالتقىشتىڭ ونداعان مەترگە ۇشىپ كەتكەنى، ال اۆتوكولىكتەردىڭ تەمىر ۇيىندىسىنە اينالعانى كورىنەدى.
الدىن الا مالىمەتتەر بويىنشا، كولىكتىڭ بىرىندە التى بالا بولعان. ولاردىڭ بارلىعى ءارتۇرلى اۋىرلىقتاعى جاراقاتتارمەن اۋرۋحاناعا جەتكىزىلدى. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى زارداپ شەككەندەردىڭ جاعدايى تۋرالى كەيىنىرەك حابارلايتىنىن ايتتى.
سولتۇستىك قازاقستان وبلىسى پوليسيا دەپارتامەنتىنىڭ ءباسپاسوز قىزمەتىنىڭ ناقتىلاۋىنشا، Mazda جانە Toyota Estima كولىكتەرىنىڭ قاتىسۋىمەن بولعان جول اپاتى پەتروپاۆل – كوكشەتاۋ تاس جولىنىڭ اققايىڭ اۋدانىنداعى استراحانكا اۋىلى ماڭىندا ورىن العان.
«اپات سالدارىنان Mazda كولىگىنىڭ جۇرگىزۋشىسى مەن Toyota Estima سالونىندا بولعان جەتى ادام مەديسينالىق مەكەمەلەرگە جەتكىزىلدى. جول اپاتى فاكتىسى بويىنشا قىلمىستىق ءىس قوزعالدى. قازىرگى ۋاقىتتا وقيعانىڭ ءمان-جايى انىقتالۋدا. تەرگەۋ ناتيجەسى بويىنشا پروسەسسۋالدىق شەشىم قابىلدانادى»، — دەپ ءتۇسىندىردى وبلىستىق پوليسيا دەپارتامەنتى.
پوليسيا قىزمەتكەرلەرى جۇرگىزۋشىلەرگە جىلدامدىق رەجيمىن قاتاڭ ساقتاۋ، جول جانە اۋا رايى جاعدايلارىن ەسكەرۋ، قارسى جولاققا شىعۋعا جول بەرمەۋ جانە رولدە وتە مۇقيات بولۋ قاجەتتىگىن ەسكەرتتى.
سونىمەن قاتار وبلىس تۇرعىندارى اپاتتىڭ قايتادان جەكە تاسىمالداۋشىنىڭ قاتىسۋىمەن بولعانىن تالقىلاپ جاتىر. سولتۇستىكقازاقستاندىقتار قوسىمشالار ارقىلى قالاارالىق جەكە تاسىمالداۋدىڭ قاۋىپسىزدىگى ماسەلەسىن بىرنەشە رەت كوتەرگەن. ولاردىڭ پىكىرىنشە، تاكسي جۇرگىزۋشىلەرى تابىس تابۋ ءۇشىن كۇنىنە بىرنەشە رەيس جاسايدى، جىلدامدىقتى ايتارلىقتاي ارتتىرادى جانە تەلەفونعا الاڭدايدى.
سوڭعى جىلدارى وڭىردە مۇنداي تاسىمالداۋشىلاردىڭ قاتىسۋىمەن بىرنەشە جول اپاتى تىركەلدى. 2026 جىلعى ساۋىردە سولتۇستىك قازاقستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى كىناسىنەن اپاتتا گەرمانيا ازاماتتارىنىڭ وتباسى – جاس ايەل، ونىڭ اكەسى مەن كۇيەۋى قازا تاپقان جۇرگىزۋشىگە ۇكىم شىعاردى. 29 جاستاعى ەر ادام جالعا الىنعان كولىكتە ءموبيلدى قوسىمشا ارقىلى جەكە تاكسيمەن اينالىسقان. سوت وعان بەس جىل باس بوستاندىعىنان ايىرۋ جانە جەتى جىلعا كولىك جۇرگىزۋ قۇقىعىنان ايىرۋ جازاسىن تاعايىندادى، جازانى مينيمالدى قاۋىپسىزدىكتەگى قىلمىستىق-اتقارۋ جۇيەسى مەكەمەسىندە وتەۋگە بەلگىلەدى.