پەتروپاۆلدا سوت ساقتاندىرۋ كومپانياسىنان جول اپاتىنان كەيىن كولىك يەسىنە 2 ملن تەڭگەدەن استام وتەماقى ءوندىردى، دەپ حابارلايدى infohub.kz سايتى.
سولتۇستىك قازاقستان وبلىسى سوتتارىنىڭ رەسمي Telegram-ارناسىندا حابارلانعانداي، پەتروپاۆل №2 سوتى كولىك يەسىنىڭ ساقتاندىرۋ كومپانياسىنا قاتىستى ازاماتتىق ءىسىن قارادى. تالاپكەر كولىككە كەلتىرىلگەن زالال مولشەرىن انىقتاۋ ناتيجەلەرىن جالعان دەپ تانۋدى جانە ساقتاندىرۋ تولەمىن ءوندىرۋدى سۇرادى.
سوتقا جۇگىنۋگە سەبەپ بولعان جول-كولىك وقيعاسىنىڭ كىنالىسى اكىمشىلىك جاۋاپكەرشىلىككە تارتىلدى. ونىڭ ازاماتتىق-قۇقىقتىق جاۋاپكەرشىلىگى ساقتاندىرۋ كومپانياسىندا ساقتاندىرىلعان.
ساقتاندىرۋ جاعدايى ورىن العاننان كەيىن ساقتاندىرۋ كومپانياسى كولىكتى جوندەۋ قۇنىن 674 413 تەڭگە دەپ باعالادى. بۇل سومامەن كەلىسپەگەن كولىك يەسى تاۋەلسىز باعالاۋشىعا جۇگىندى، ول توزۋدى ەسكەرە وتىرىپ، شىعىندى 2 325 106 تەڭگە دەپ انىقتادى.
ودان كەيىن كولىك يەسى ساقتاندىرۋ ومبۋدسمەنىنە ساقتاندىرۋ تولەمىن قايتا قاراۋ تۋرالى تالاپپەن جۇگىندى. ءوتىنىشتى قاراۋ ناتيجەسى بويىنشا تولەم سوماسى 873 748 تەڭگە بولىپ بەلگىلەندى. بۇعان دا كەلىسپەگەن تالاپكەر سوتقا جۇگىندى.
سوت تالقىلاۋى بارىسىندا سوت اۆتوتاۋارتانۋ ساراپتاماسى تاعايىندالدى. ساراپشىنىڭ قورىتىندىسى بويىنشا، توزۋدى ەسكەرە وتىرىپ، زاقىمدالعان كولىكتى قالپىنا كەلتىرۋ ءۇشىن قاجەتتى جوندەۋ جۇمىستارىنىڭ، قوسالقى بولشەكتەر مەن ماتەريالداردىڭ قۇنى 1 829 499 تەڭگەنى قۇرادى.
سوت ساراپتاما قورىتىندىسىن دۇرىس دەپ تانىدى، سەبەبى زەرتتەۋ بىلىكتى مامانمەن بەلگىلەنگەن تالاپتاردى ساقتاي وتىرىپ جۇرگىزىلدى. ساراپتاما ساقتاندىرۋ كومپانياسى بەلگىلەگەن جوندەۋ قۇنىنىڭ تومەندەتىلگەنىن راستادى.
ناتيجەسىندە سوت ساقتاندىرۋ كومپانياسىنىڭ ەسەپ-قيسابىن جالعان دەپ تانىپ، كولىك يەسىنىڭ پايداسىنا 1 829 499 تەڭگە مولشەرىندە ساقتاندىرۋ تولەمىن ءوندىردى. سونىمەن قاتار ساقتاندىرۋ كومپانياسىنان سوت شىعىندارى دا ءوندىرىلدى. تالاپكەرگە تولەنەتىن جالپى سوما 2 039 821 تەڭگەنى قۇرادى.
سوت شەشىمى سولتۇستىك قازاقستان وبلىستىق سوتىنىڭ ازاماتتىق ىستەر جونىندەگى اپەللياسيالىق القاسىمەن وزگەرىسسىز قالدىرىلىپ، زاڭدى كۇشىنە ەندى.