سومالي جاعالاۋىندا مۇناي تاسيتىن كەمەنى باسىپ العان قاراقشىلار جەرگىلىكتى قاۋىپسىزدىك كۇشتەرى كەمەنى قايتارىپ العانعا دەيىن ەكيپاجدىڭ بەس مۇشەسىن ءولتىردى. بۇل تۋرالى BBC-گە پۋنتلەند ايماعىنىڭ اقپارات ءمينيسترىنىڭ ورىنباسارى بيلە قابوۆسادە مالىمدەدى، دەپ حابارلايدى infohub.kz سايتى.
ونىڭ ايتۋىنشا، ايماقتىق كۇشتەر «MT Hoarner 25» كەمەسىنە كوتەرىلمەي تۇرىپ، قاراقشىلار بەس ادامدى ولتىرگەن. قازا تاپقانداردىڭ قاتارىندا ءۇش پاكىستان، ءبىر ءۇندىستان جانە ءبىر ميانما ازاماتى بولدى. تاعى ءتورت ەكيپاج مۇشەسى — ءۇش پاكىستاندىق پەن ءبىر ءۇندىستاندىق جاراقات الدى.
سومالي استاناسى موگاديشوگا باعىتتالعان، شامامەن 18 500 باررەل مۇناي تاسىمالداعان كەمەنى ءساۋىر ايىندا سومالي جاعالاۋىندا ءجۇزىپ بارا جاتقاندا التى قارۋلى ادام باسىپ العان بولاتىن.
رەسمي وكىلدەردىڭ مالىمدەۋىنشە، قاراقشىلىققا كۇدىكتى 16 ادام ۇستالدى، ال قالعاندارى قاشىپ كەتتى، ولاردى ۇستاۋ جالعاسۋدا.
قابوۆسادە ءسوماليدىڭ جارتىلاي اۆتونوميالى پۋنتلەند ايماعىنىڭ كۇشتەرى قاراقشىلاردىڭ كەيبىرىنىڭ قاشۋىنا كومەكتەستى دەگەن بولجامدى جوققا شىعاردى. بيلىك بەس ەكيپاج مۇشەسىنىڭ قالاي ولتىرىلگەنى نەمەسە قاراقشىلاردىڭ كەمەنى قالاي باسىپ العانى تۋرالى قوسىمشا مالىمەت بەرگەن جوق.
باسىپ الىنعان كەمە سومالي جاعالاۋىنا جاقىن، Xaafun جانە Bander Beyla بالىقشى قالاشىقتارىنىڭ اراسىنداعى ايماقتا تۇراقتاعان.
ءساۋىر ايىندا رەسمي وكىلدەر كەمە باسىپ الىنعان كەزدە بورتىندا 17 ەكيپاج مۇشەسى بولعانىن ايتقان. ولاردىڭ قاتارىندا 10 پاكىستاندىق، ءتورت يندونەزيالىق، ءبىر ءۇندىستاندىق، ءبىر شري-لانكا ازاماتى جانە ءبىر ميانما ازاماتى بولعان.
حالىقارالىق تەڭىز وپەراسيالارىنان كەيىن 2011 جىلدان باستاپ سومالي جاعالاۋىنداعى قاراقشىلىق كۇرت ازايعان ەدى، الايدا سوڭعى جىلدارى شابۋىلدار مەن كەمە باسىپ الۋ قايتادان كوبەيدى.