وڭتۇستىك كورەيا سوتى اسكەري بورىشتان جالتاردى دەپ ايىپتالعان k-pop Winner توبىنىڭ 33 جاستاعى مۇشەسى سون مين حوعا ۇكىم شىعاردى، دەپ حابارلايدى infohub.kz سايتى.
ەل زاڭناماسى بويىنشا ءانشى 18 اي اسكەري بورىشىن وتەۋى ءتيىس ەدى. ونىڭ ورنىنا ول بالامالى قىزمەتتى تاڭداپ، 21 اي بويى سەۋلدەگى قوعامدىق ورتالىقتا الەۋمەتتىك قىزمەتكەر بولىپ جۇمىس ىستەۋگە مىندەتتەلدى. قىزمەت 2023–2024 جىلدارى ارالىعىندا ءوتتى، دەپ جازادى BBC.
تەرگەۋ 2024 جىلى سون مين حونىڭ جۇمىس ورنىندا ءجيى بولماۋى تۋرالى وڭتۇستىككورەيالىق ب ا ق حابارلاعاننان كەيىن باستالدى. سوت ونىڭ قوعامدىق ورتالىققا كەمىندە 102 رەت كەلمەگەنىن، سونداي-اق بىرنەشە رەت ەڭبەككە جارامسىزدىق پاراعىن العانىن انىقتادى.
سوت الدىندا انشىمەن بىرگە ورتالىقتاعى ونىڭ تىكەلەي جەتەكشىسى دە جاۋاپ بەردى. ول سون مين حونىڭ جۇمىستا بولعانىن راستايتىن قۇجاتتاردى قولدان جاساعان. ەكەۋى دە شارتتى مەرزىمگە سوتتالدى. ءانشىنىڭ جازاسى ەكى جىلعا كەيىنگە قالدىرىلدى: ەگەر وسى ۋاقىت ىشىندە ول باسقا قىلمىس جاساماسا، سوتتىلىقتان قۇتىلا الادى.
بۇل — تانىمال وڭتۇستىككورەيالىق انشىلەردىڭ سوتقا تارتىلۋىنىڭ العاشقى وقيعاسى ەمەس. وڭتۇستىك كورەيانىڭ قارقىندى دامىپ كەلە جاتقان ويىن-ساۋىق يندۋسترياسىندا ءبىر جىلدىق ءۇزىلىس ءانشى ءۇشىن مانساپتىڭ اياقتالۋىنا اكەلۋى مۇمكىن. ءانشى Psy اسكەردە ەكى رەت قىزمەت ەتتى، ويتكەنى ءبىرىنشى رەتىندە قىزمەت ورنىنا ونەر كورسەتۋدى جالعاستىرعان. ستيۆ يۋ اسكەردەن مۇلدەم جالتارعان، بيلىك وعان ەلگە كىرۋگە تىيىم سالدى. سون مين حو ەكىنشى رەت قىزمەت ەتە مە، ازىرگە بەلگىسىز.
ايتا كەتەيىك، Winner توبى 2013 جىلدان بەرى ونەر كورسەتىپ كەلەدى. ونىڭ قۇرامىندا ءتورت ادام بار: كيم دجينۋ، لي سىن حۋن، كان سىن يۋن جانە سون مين حو. بويز-بەند اقش پەن لاتىن امەريكاسى ەلدەرىنە گاسترولدىك ساپارمەن بارعان جانە Melon Music Awards سياقتى كوپتەگەن مۋزىكالىق ماراپاتتارعا يە.
بۇعان دەيىن Kursiv LifeStyle k-pop SHINee توبىنىڭ مۇشەسى تەميننىڭ قازاقستاندا العاش رەت ونەر كورسەتەتىنىن جازعان بولاتىن.