بۇعان دەيىن اق ۇيگە كىرۋگە تىيىم سالىنعان ءۇش امەريكاندىق جاڭالىق باسىلىمىنىڭ تىلشىلەرى سوت شەشىمىنەن كەيىن اقش پرەزيدەنتى دونالد ترامپتىڭ رەزيدەنسياسىنا قايتا كىردى، دەپ حابارلايدى infohub.kz سايتى.
CNN حابارلاۋىنشا، MS NOW، CNN جانە Politico وكىلدەرى فەدەرالدىق سۋديا ترامپ اكىمشىلىگىن باسپاسوزگە اككرەديتتەۋدى ۋاقىتشا قالپىنا كەلتىرۋگە مىندەتتەگەننەن كەيىن اق ۇيدە قايتا جۇمىس ىستەي الدى.
الايدا سوت قاۋلىسىنا قاراماستان، الدىڭعى كۇنى تاڭەرتەڭ ءۇش باسىلىمنىڭ تىلشىلەرىنە قايتادان كىرۋ قيىندىق تۋعىزدى. سوندا جاڭالىق ۇيىمدارى شۇعىل تىڭداۋ وتكىزۋ تۋرالى ارىز بەردى. وسىدان كەيىن ترامپ اكىمشىلىگى ب ا ق وكىلدەرىنە اق ءۇي اۋماعىنا قايتا كىرۋگە رۇقسات ەتتى.
بۇعان دەيىن اقش-تاعى سوت CNN، MS NOW جانە Politico تىلشىلەرىن اق ۇيگە جىبەرمەۋ زاڭسىز بولعانىن انىقتادى. سۋديا تيموتي كەللي اقش پرەزيدەنتى دونالد ترامپتىڭ تىلشىلەردىڭ رۇقساتتارىن جويۋ تۋرالى شەشىمى «ولاردىڭ كونستيتۋسيالىق قۇقىقتارىن بۇزۋى ىقتيمال» دەپ مالىمدەدى.
ەسكە سالايىق، 18 قىركۇيەكتە اقش پرەزيدەنتى CNN، MS NOW جانە Politico تىلشىلەرىنە اق ۇيگە كىرۋگە تىيىم سالاتىنىن، ويتكەنى بۇل باسىلىمدار جالعان جاڭالىق تاراتىپ جۇرگەنىن حابارلاعان. كەلەسى كۇنى-اق وسى باسىلىمداردىڭ تىلشىلەرى اق ۇيگە كىرگىزىلمەگەنىن مالىمدەدى.
كەيىن دونالد ترامپ وسى جاڭالىق ۇيىمدارىنىڭ لوگوتيپتەرى بار قوقىس قاپتارىنىڭ سۋرەتىن جاريالادى.
كەيىنىرەك CNN، MSNBC جانە Politico تىلشىلەرىنە اق ۇيگە كىرۋگە تىيىم سالىنعاننان كەيىن ولار پرەزيدەنت دونالد ترامپقا قارسى تالاپ قويعانى بەلگىلى بولدى.
جانجالعا بايلانىستى ءبىرقاتار جەتەكشى امەريكاندىق ب ا ق اقش پرەزيدەنتى دونالد ترامپ اكىمشىلىگىنە بويكوت جاريالادى — تەلەارنالار اق ءۇي باسشىسى قاتىساتىن ءىس-شارالاردى پۋلدىق جاريالاۋدى توقتاتتى.