الماتى وبلىسى الاتاۋ قالاسىنىڭ پروكۋراتۋراسى سوت ارقىلى قالالىق قوقىس پوليگونىن كوممۋنالدىق مەنشىككە قايتارۋعا قول جەتكىزدى. بۇعان دەيىن پوليگون ىلە اۋدانىنىڭ بۇرىنعى اكىمى باعدات قاراساەۆتىڭ كومپانياسىنا سەنىمگەرلىك باسقارۋعا بەرىلگەن ەدى. بۇل تۋرالى باس پروكۋراتۋرا حابارلادى، دەپ جازادى infohub.kz سايتى.
«الاتاۋ قالاسىنىڭ پروكۋراتۋراسى ۇسىنىمى بويىنشا سوتقا 34 گا قوقىس پوليگونىن «ADC TAZA ALEM» جشس-مەن جاسالعان سەنىمگەرلىك باسقارۋ شارتىن جارامسىز دەپ تانۋ تۋرالى تالاپ قويىلدى. اتالعان ج ش س ءىس جۇزىندە ىلە اۋدانىنىڭ بۇرىنعى اكىمى قاراسايەۆ ب.-عا تيەسىلى بولعانى انىقتالدى. ول 2025 جىلعى 27 قاراشاداعى سوت ۇكىمىمەن سىبايلاس جەمقورلىق قىلمىسى جانە زاڭسىز كاسىپكەرلىك ءۇشىن سوتتالعان… الماتى وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن تالاپ تولىق كولەمدە قاناعاتتاندىرىلدى»، — دەلىنگەن جاريالانعان حابارلامادا.
شارت بويىنشا باسقارۋشى كومپانيا ينۆەستيسيا تارتۋعا، قاتتى تۇرمىستىق قالدىقتاردى وڭدەيتىن زاۋىت سالۋعا، كىرىستىڭ ءبىر بولىگىن جەرگىلىكتى بيۋدجەتكە اۋدارۋعا جانە جويۋ قورىن قۇرۋعا مىندەتتەلگەن. الايدا بۇل مىندەتتەمەلەر ورىندالمادى. ءىس جۇزىندە كومپانيانىڭ قىزمەتى قالدىقتاردى جيناۋمەن عانا شەكتەلدى.
پوليگوندى ءتيىستى دەڭگەيدە باسقارماۋ اۋىر ەكولوگيالىق سالدارعا اكەپ سوقتى. 2021–2025 جىلدارى پوليگون اۋماعىندا التى ءورت تىركەلدى. ەڭ اۋقىمدى ءورت 2025 جىلدىڭ قىركۇيەگىندە بولىپ، بىرنەشە كۇندە 30 گا اۋماقتى وت شارپىدى. ءورت ءتۇتىنى الماتى قالاسىن جانە وزگە دە اۋماقتاردى تۇمشالادى.
2025 جىلدىڭ قىركۇيەگىندە تجم وسى قتق پوليگونىنا جاۋاپتى كومپانيا سول كەزدە ەكولوگيالىق جانە ءورت قاۋىپسىزدىگى سالاسىنداعى جىبەرىلگەن بۇزۋشىلىقتار ءۇشىن ەكى رەت اكىمشىلىك جاۋاپكەرشىلىككە تارتىلعانىن مالىمدەگەن.
ماقالا جازىلعان ساتتە ىلە اۋدانىنىڭ بورولداي اۋىلىندا تىركەلگەن ADC TAZA ALEM كومپانياسىنىڭ جالعىز يەسى رەتىندە بولاتجان دۇيسەباي كورسەتىلگەن. ول 2024 جىلدىڭ 12 قىركۇيەگىنەن باستاپ كومپانيانىڭ قۇرىلتايشىسى — بۇعان دەيىن قۇرىلتايشىلار قاتارىندا ەرنات ازىمبەكوۆ، تولەۋجان مۇقانوۆ، تالعات اداموۆ، ەرلان دۇيسەبايەۆ جانە بولاتجان دۇيسەبايدىڭ ءوزى بولعان.
ADC TAZA ALEM 2026 جىلى ەشقانداي سالىق تولەمەگەن، 2025 جىلى تولەمدەر 2،4 ملن تەڭگە، 2024 جىلى — 10،6 ملن تەڭگە، 2023 جىلى — 9،4 ملن تەڭگەنى قۇراعان.
باعدات قاراسايەۆ 2018–2024 جىلدارى الماتى وبلىسى ىلە اۋدانىنىڭ اكىمى بولعان. 2024 جىلدىڭ قىركۇيەگىندە سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى ونى جەمقورلىققا كۇدىكپەن ۇستاعان. 2025 جىلى باعدات قاراسايەۆ ق ر قىلمىستىق كودەكسىنىڭ 361-بابىنىڭ 3-تارماعىمەن (مەملەكەتتىك لاۋازىمدى اتقاراتىن ادامنىڭ ءوز قىزمەت بابىن اسىرا پايدالانۋى) جانە 364-بابىنىڭ 3-بولىگىمەن (كاسىپكەرلىك قىزمەتكە زاڭسىز قاتىسۋ) سوتتالىپ، ءۇش جىل ءۇش ايعا باس بوستاندىعىنان ايىرىلدى. وعان مەملەكەتتىك ورگانداردا لاۋازىم اتقارۋعا ءومىر بويى تىيىم سالىندى.