جامبىل وبلىسىندا سوت مەدياسياسى 37 جىل بۇرىن تۋىنداعان اسىراۋشىسىنان ايىرىلۋ بويىنشا جاردەماقى تاعايىنداۋ تۋرالى داۋدى رەتتەۋگە كومەكتەستى، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، بايزاق اۋداندىق سوتى ايەلدىڭ حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتىنە قويعان تالابى بويىنشا اكىمشىلىك ءىستى قارادى. تالاپكەردىڭ اناسى 1989 جىلى قايتىس بولعان، ال تالاپكەردىڭ ءوزى بالا كەزىنەن ەكىنشى توپتاعى مۇگەدەك. اناسى قايتىس بولعانعا دەيىن ول ءوز بەتىنشە تابىس تابا الماعاندىقتان، اناسىنىڭ اسىراۋىندا بولعان.
ايەل دەپارتامەنتكە اسىراۋشىسىنان ايىرىلۋ بويىنشا جاردەماقى تاعايىنداۋ تۋرالى وتىنىشپەن جۇگىنگەن، الايدا ونىڭ ءوتىنىشى قاناعاتتاندىرىلماعان. جاۋاپكەر الدىمەن اناسىنىڭ اسىراۋىندا بولعانىن انىقتاۋ قاجەت ەكەنىن تۇسىندىرگەن. باس تارتۋمەن كەلىسپەگەن تالاپكەر سوتقا تالاپ ارىز بەرگەن.
سوت جۇرگىزگەن تاتۋلاسۋ راسىمدەرى بارىسىندا تاراپتار داۋدى مەدياسيا تارتىبىمەن رەتتەۋ تۋرالى كەلىسىمگە قول جەتكىزدى. كەلىسىم شارتتارى بويىنشا تالاپكەر جاردەماقى تاعايىنداۋ تۋرالى وتىنىشپەن دەپارتامەنتكە قايتا جۇگىنۋگە مىندەتتەندى، ال جاۋاپكەر ءوتىنىشتى ءتيىستى تۇردە قاراپ، ول بويىنشا وڭتايلى شەشىم قابىلداۋعا مىندەتتەندى. كەلىسىمگە قول جەتكىزۋگە بايلانىستى تالاپكەر قويىلعان تالاپتاردان باس تارتتى، ال سوت مەدياسيا شارتتارىن بەكىتىپ، اكىمشىلىك تالاپ ارىزدى قايتاردى. سونىمەن قاتار، تالاپكەرگە مەملەكەتتىك باج قايتارىلدى. ۇيعارىم زاڭدى كۇشىنە ەندى.