وڭتۇستىك قازاقستان قورىق ايماعىندا كەن ورىندارىن يگەرۋدى جوسپارلاپ وتىرعان Sozak Oil and Gas گاز ءوندىرۋ كومپانياسىنىڭ مەنشىك قۇرىلىمى تۇبەگەيلى وزگەردى: 2026 جىلدىڭ ءبىرىنشى جارتىجىلدىعىندا نەگىزگى يەسى ءوز ۇلەسىن ايتارلىقتاي قىسقارتتى، ال كاپيتالعا بىردەن بەس جاڭا ينۆەستور كىردى. سونىمەن قاتار كاسىپورىننىڭ تازا شىعىنى شامامەن 17 ەسە ءوسىپ، 1،1 ملرد تەڭگەگە جەتتى، دەپ حابارلايدى infohub.kz سايتى.
2026 جىلعى 30 ماۋسىمدا اياقتالعان التى ايلىق قارجىلىق ەسەپتىلىككە سايكەس، بۇرىن اكسيالاردىڭ 49،2%-ىن باقىلاعان نيدەرلاندىلىق Sino–Science Netherlands Petroleum B.V. ءوز ۇلەسىن 12%-عا دەيىن قىسقارتتى. ال ونىمەن بايلانىستى Sino–Science Netherlands Energy Group B.V. قۇرىلىمى ۇلەسىن 7،859%-دان 10،495%-عا دەيىن ۇلعايتتى.
Sozak Oil and Gas كومپانياسىنىڭ ەڭ ءىرى اكسيونەرى 18% اكسيا العان جاڭا Yongyou Technology Services Limited كومپانياسى بولدى. مەنشىك يەلەرى قاتارىنا سونداي-اق Global Petro Ventures Limited — 9،2%، Wisestrategy Capital Management Pte. Ltd — 4%، Summit Peak Capital Investment Pte. Ltd — 3% جانە Richfort Global Capital Management Pte. Ltd — 3% كىردى.
ءوز باعالى قاعاز پاكەتتەرىن سينگاپۋرلىق Singapore Charter Power Pte. Ltd (17%) مەن Singapore Starlights Energy Investment Pte. Ltd (5،855%)، سونداي-اق قازاقستاندىق «ماتەن پەترولەۋم» اق (10%) مەن Luck Gain International Limited (5،45%) ساقتاپ قالدى. Ufirst Energy Group Limited ۇلەسى 4،636%-دان 2%-عا تومەندەدى.
Yonyou Technology Services — كاسىپورىنداردى باسقارۋعا ارنالعان باعدارلامالىق جاساقتاما (ERP)، بۇلتتىق سەرۆيستەر جانە سيفرلىق ترانسفورماسيا شەشىمدەرى بويىنشا قىتايدىڭ ەڭ ءىرى پروۆايدەرى. نيدەرلاندىدا تىركەلگەنىنە قاراماستان، قازاقستانداعى مۇناي-گاز جوبالارىنا Sino-Science Netherlands ارقىلى ءدال قىتايلىق ينۆەستورلار قاتىسىپ وتىر.
2026 جىلدىڭ ءبىرىنشى جارتىجىلدىعىندا Sozak Oil and Gas كومپانياسىنىڭ تازا شىعىنى 1،1 ملرد تەڭگە بولدى، ال 2025 جىلدىڭ وسى كەزەڭىندە ول 65،5 ملن تەڭگە دەڭگەيىندە ەدى. كومپانيانىڭ جارتىجىلدىق وپەراسيالىق شىعىنى 72،08 ملن تەڭگە بولدى (ءبىر جىل بۇرىن 78 ملن تەڭگە). ال باعامدىق ايىرما بويىنشا شىعىستار 1،16 ملرد تەڭگەگە (1 158 434 مىڭ تەڭگە) جەتتى.
كاسىپورىننىڭ 2026 جىلعى 30 ماۋسىمداعى جيىنتىق اكتيۆتەرى 73،95 ملرد تەڭگەگە باعالانادى. ونىڭ 68،16 ملرد تەڭگەسى بارلاۋ جانە باعالاۋ اكتيۆتەرىنە تيەسىلى.
بۇعان دەيىن ق ر ەنەرگەتيكا مينيسترلىگى Sozak Oil and Gas كومپانياسىنا التى كەن ورنىندا — اسا، كەندىرلىك، ورتالىق، وپپاق، تامعالىتار جانە پريدوروجنوە يۋجنوە — گاز وندىرۋگە رۇقسات بەرەتىن ۇكىمەت قاۋلىسىنىڭ جوباسىن جاريالاعان. ولاردىڭ بارلىعى وڭتۇستىك قازاقستان مەملەكەتتىك قورىق ايماعىندا ورنالاسقان. زاڭ بويىنشا مۇنداي جەرلەردە پايدالى قازبالاردى ءوندىرۋ تەك «ەرەكشە جاعدايلاردا، ۇكىمەت شەشىمىنىڭ نەگىزىندە» مۇمكىن.