حالىقارالىق رەيتينگتىك اگەنتتىك S&P Global Ratings قازاقستاننىڭ ەگەمەندىك كرەديتتىك رەيتينگىن 2016 جىلدان بەرى العاش رەت «BBB-» دەڭگەيىنەن «BBB» دەڭگەيىنە كوتەردى. رەيتينگ بويىنشا بولجام — «تۇراقتى»، دەپ حابارلايدى infohub.kz سايتى.
اگەنتتىك مۇنداي شەشىمدى ەكونوميكانىڭ تۇراقتى پەرسپەكتيۆالارىمەن، جالعاسىپ جاتقان ارتاراپتاندىرۋمەن، سونداي-اق ەلدىڭ ايتارلىقتاي سىرتقى جانە بيۋدجەتتىك رەزەرۆتەرىمەن ءتۇسىندىردى.
S&P باعالاۋىنشا، سىرتقى تاۋەكەلدەر مەن الەمدىك شيكىزات باعاسىنىڭ اۋىتقۋىنا قاراماستان، قازاقستان ەكونوميكاسى ورتا مەرزىمدى پەرسپەكتيۆادا ءوسۋدى جالعاستىرادى. ساراپشىلار 2026 جىلدىڭ قورىتىندىسى بويىنشا ەلدىڭ ناقتى ءجىو ءوسىمى 5،1 پايىزدى قۇرايدى دەپ كۇتەدى. سونىمەن قاتار، اگەنتتىكتىڭ بولجامى بويىنشا، قازاقستان مۇناي ەكسپورتتاۋشى ەلدەر اراسىندا سالىستىرمالى تۇردە جوعارى ءوسۋ قارقىنىن ساقتايدى.
S&P سونداي-اق شيكىزاتتى وڭدەۋ مەن ينفراقۇرىلىمدى دامىتۋعا باعىتتالعان اۋقىمدى ينۆەستيسيالىق باعدارلامانى اتاپ ءوتتى. اتاپ ايتقاندا، «بايتەرەك» ۇلتتىق حولدينگى ارقىلى جوبالاردى قارجىلاندىرۋ ينۆەستيسيا كولەمىن ءجىو-نىڭ 30 پايىزىنا دەيىن ارتتىرۋعا كومەكتەسۋى ءتيىس.
اگەنتتىك بيۋدجەت شىعىستارىنىڭ ءوسۋىن تەجەۋ جانە سالىق بازاسىن كەڭەيتۋ بيۋدجەت تاپشىلىعىن بىرتىندەپ قىسقارتۋعا مۇمكىندىك بەرەدى دەپ سانايدى.
S&P قازاقستاننىڭ كۇشتى سىرتقى پوزيسياسىن بولەك اتاپ ءوتتى. ۆاليۋتالىق اكتيۆتەردىڭ ايتارلىقتاي كولەمى ورتاشا سىرتقى قارىزدان اسىپ تۇسەدى، وسىنىڭ ارقاسىندا ەل ءىرى سىرتقى كرەديتور مارتەبەسىن ساقتاپ وتىر.
اگەنتتىك بانك سەكتورىنىڭ جاي-كۇيىن دە وڭ باعالادى. ساراپشىلاردىڭ پىكىرىنشە، رەتتەۋ مەن قاداعالاۋدى كۇشەيتۋ بانكتەردىڭ ماكروەكونوميكالىق سوققىلارعا توزىمدىلىگىن ارتتىرىپ، اكتيۆتەر ساپاسىنا بايلانىستى جۇيەلىك تاۋەكەلدەردى تومەندەتتى.
بۇعان دەيىن قازاقستاننىڭ ەگەمەندىك كرەديتتىك رەيتينگى «BBB-» دەڭگەيىندە بولعان ەدى.