مەملەكەتتىك بالالار مەن جاسوسپىرىمدەر سپورت مەكتەپتەرى جاڭا قارجىلاندىرۋ جۇيەسىنە كوشىرىلەدى. ەندى بيۋدجەت قاراجاتىنىڭ كولەمى مەكەمەنىڭ سمەتاسىنا عانا ەمەس، تاربيەلەنۋشىلەر سانىنا قاراي ەسەپتەلەتىن بولادى، دەپ حابارلايدى سايتى infohub.kz.
تۋريزم جانە سپورت مينيسترلىگى مەملەكەتتىك بالالار مەن جاسوسپىرىمدەر سپورت مەكتەپتەرىن (ديۋسش) جان باسىنا شاققانداعى نورماتيۆتىك قارجىلاندىرۋ ادىستەمەسىن بەكىتتى. ول 2026 جىلدىڭ شىلدە ايىنىڭ سوڭىنا قاراي كۇشىنە ەنەدى.
جاڭا جۇيە بويىنشا مەملەكەت ءاربىر سپورتشىعا كەتەتىن شىعىننىڭ كەپىلدى كولەمىن ەسەپتەيدى. نورماتيۆكە جاتتىقتىرۋشىلار مەن اكىمشىلىك قىزمەتكەرلەردىڭ جالاقىسى، سپورتتىق كيىم مەن جابدىق، جارىستارعا جانە وقۋ-جاتتىعۋ جيىندارىنا قاتىسۋ، سونداي-اق فارماكولوگيالىق قامتاماسىز ەتۋ كىرەدى. ال عيماراتتاردى كۇتىپ-ۇستاۋ، كوممۋنالدىق قىزمەتتەر، بايلانىس جانە كولىك شىعىندارى بۇرىنعىشا سمەتا بويىنشا جەكە قارجىلاندىرىلادى.
قارجىلاندىرۋ كولەمى بالانىڭ قانداي سپورت تۇرىمەن اينالىساتىنىنا دا بايلانىستى بولادى. بارلىق سپورت تۇرلەرى شىعىندىلىعىنا قاراي ءۇش ساناتقا ءبولىندى. ەڭ قىمبات توبىنا، مىسالى، شايبالى حوككەي، سۋ سپورتى تۇرلەرى، ات سپورتى، بياتلون، كەرلينگ، جەلكەندى سپورت جانە كيبەرسپورت كىردى. ورتاشا توبىنا — فۋتبول، تەننيس، ۆولەيبول، باسكەتبول جانە سپورتتىق گيمناستيكا. ال ەڭ از شىعىندى توپقا بوكس، دزيۋدو، مما، شاحمات، توعىزقۇمالاق، سامبو، كيكبوكسينگ، كاراتە جانە باسقا دا سپورت تۇرلەرى ەندى.
سونىمەن قاتار، اۆتورلار جاتتىقتىرۋشىلاردىڭ جۇكتەمەسىن ەسەپتەۋ، وقۋ توپتارىنىڭ سانى جانە سپورتشىلاردىڭ جارىستار مەن جيىندارعا قاتىسۋ شىعىندارىنىڭ ءبىرىڭعاي ەرەجەلەرىن بەلگىلەدى. مينيسترلىكتىڭ ويىنشا، بۇل بۇكىل ەل بويىنشا مەملەكەتتىك سپورت مەكتەپتەرىن قارجىلاندىرۋدى ءبىرىڭعايلاۋعا مۇمكىندىك بەرەدى.