ستامبۇلدىڭ بۇرىنعى مەرى ەكرەم يماموگلۋ جاڭا مەرزىم الدى: تۇركيا سوتى ونى ەكى جىل ءبىر ايعا باس بوستاندىعىنان ايىرىپ، ساياساتپەن اينالىسۋعا تىيىم سالدى. بۇل تۋرالى infohub.kz سايتى حابارلايدى.
شەشىم ساياساتكەردىڭ ستامبۇلدىڭ تۋزلا اۋدانى اكىمشىلىگىنىڭ بۇرىنعى باسشىسى شادي يازىدجيگە ايتقان سوزدەرىنە قاتىستى ءىس بويىنشا شىعارىلدى. بۇعان دەيىن وسى ءىس بويىنشا يماموگلۋ اقتالعان ەدى، الايدا اپەللياسيالىق ساتى اقتاۋ ۇكىمىن كۇشىنەن قالدىرىپ، ءىس ماتەريالدارىن قايتا قاراۋعا جىبەردى.
بۇعان دەيىن حابارلانعانداي، قويىلعان ايىپتاردىڭ جيىنتىعى بويىنشا ستامبۇلدىڭ ەكس-مەرىنە 2 430 جىلعا دەيىن باس بوستاندىعىنان ايىرۋ جازاسى ءقاۋىپ تونگەن.
ەسكە سالايىق، ەكرەم يماموگلۋ مەن ونىڭ باسپاسوزبەن بايلانىس جونىندەگى كەڭەسشىسى مۇرات ونگۋن سىبايلاس جەمقورلىققا قارسى ارنايى وپەراسيا بارىسىندا ۇستالىپ، 2025 جىلعى 19 ناۋرىزدا سوتقا جەتكىزىلگەن. وسىدان كەيىن ەلدە نارازىلىق شارالارى باستالدى. كوپ ۇزاماي تۇركيا سوتى يماموگلۋدى قاماۋعا الۋ تۋرالى شەشىم شىعاردى، ال قالا مەرى قىزمەتىن وپپوزيسيالىق پارتيانىڭ وكىلى نۋري اسلان اتقاردى.
شىلدەدە ستامبۇلدىڭ ەكس-مەرى پروكۋروردى قورلاعانى ءۇشىن ناقتى مەرزىمگە — 20 ايعا سوتتالعانى بەلگىلى بولدى. ال قازان ايىنىڭ سوڭىندا تۇركيا سوتى يماموگلۋدى جەمقورلىق ءىسى بويىنشا اقتادى، الايدا ستامبۇل قالالىق پروكۋراتۋراسى وعان جانە ءبىرقاتار وزگە شەنەۋنىككە 2019 جىلعى مەر سايلاۋىنا بايلانىستى تىڭشىلىق جاسادى دەگەن كۇدىكپەن جاڭا قىلمىستىق ءىس قوزعادى.