قازاقستاننىڭ 59 جولاۋشىلار پويىزىندا سپۋتنيكتىك ينتەرنەت قولجەتىمدى، دەپ حابارلايدى infohub.kz.
ۇلتتىق تاسىمالداۋشىنىڭ مالىمەتىنشە، ءقازىر Starlink 770-تەن استام ۆاگوندى قامتيدى. 2026 جىلدىڭ قىركۇيەك ايىنىڭ سوڭىنا دەيىن 124 پويىزدى — ياعني 50 باعىتتاعى 1235 ۆاگوندى سپۋتنيكتىك ينتەرنەتپەن جابدىقتاۋ جوسپارلانۋدا.
سپۋتنيكتىك ينتەرنەت كەلەسى باعىتتاردا جۇمىس ىستەيدى: نۇرلى جول — الماتى، نۇرلى جول — وسكەمەن، نۇرلى جول — ورال، نۇرلى جول — پەتروپاۆلوۆسك، الماتى-2 — وسكەمەن، قىزىلوردا — سەمەي، اقتوبە — الماتى-1، ماڭعىستاۋ — اقتوبە، ورال — ماڭعىستاۋ، اقتوبە — قازالى، اقتوبە — اتىراۋ، پاۆلودار — الماتى.
قتج پويىزداردا سپۋتنيكتىك ينتەرنەتتى 2025 جىلى تەستىلەي باستادى. Starlink پەن OneWeb استانا — الماتى، استانا — وسكەمەن، استانا — بۋراباي، استانا — سەمەي جانە الماتى — ماڭعىشلاق باعىتتارىندا سىناقتان ءوتتى.
اتالعان باعىتتارداعى جولاۋشىلارعا تەگىن بازالىق پاكەت ۋادە ەتىلگەن. بايلانىس جىلدامدىعى WhatsApp پەن Telegram-دا حات الماسۋعا جەتكىلىكتى بولۋى ءتيىس. باسقا قاجەتتىلىكتەر ءۇشىن كومپانيا جەكە تاريفتىك پاكەتتەر جاساۋدى جوسپارلاپ وتىر.
«سپۋتنيكتىك ارنانىڭ تەحنيكالىق مۇمكىندىكتەرى 100 مبيت/س دەيىنگى جىلدامدىقتى قامتاماسىز ەتەدى. تومەن وربيتالىق سپۋتنيكتىك بايلانىستى پايدالانۋ تەمىرجول جەلىسىنىڭ شالعاي ۋچاسكەلەرىندە دە ينتەرنەتكە قول جەتكىزۋگە مۇمكىندىك بەرەدى»، — دەپ جازادى قتج.
بۇعان دەيىن «كۋرسيۆ» قازاقستاندا جولاۋشىلار پويىزدارىندا ينتەرنەتتى ىسكە قوسۋ جۇمىستارى جالعاسىپ جاتقانىن جازعان بولاتىن. سيفرلىق دامۋ مينيسترلىگى وكىلدەرىنىڭ ايتۋىنشا، ونى بارلىق پويىزدارعا وتكىزۋ مۇمكىن ەمەس — تەك زاماناۋي «تالگو» پويىزدارىنا عانا.